Pavlodarǵa jumys sapary barysynda Elbasy jańadan salynǵan Pavlodar-Aqsý kópirimen tanysyp, oǵan at qoıdy, - dep habarlaıdy Qamshy.kz pavon.kz– ke silteme jasap.

Aqsý ózeniniń ústine salynyp jatqan Ortalyq Azıadaǵy eń iri kópirdi Prezıdent Pavlodar qalasynyń qurmetti azamaty Amanjol Áýbákirovtiń «Qazaqstan Táýelsizdiginiń 25 jyldyǵy» dep ataý týraly usynysyn qoldap, bekitip beripti.

«Eger óńirde jaqsy joldar bolsa, qalalarmen, eldermen baılanys bolady, ekonomıka damıdy», - depti Elbasy kópir basynda.

Qazir alyp kópirdiń qurylysy bitip, syrlaý jumystary aıaqtalýǵa jaqyn qalǵan. Jyl sońyna deıin kópir paıdalanýǵa beriledi dep josparlanýda.

Osy oraıda, Pavlodar qalasynyń atyn aýystyrý týraly másele birneshe jyldan beri kóterilip kele jatqanyn aıta ketý kerek. Jergilikti turǵyndar tarapynan eshqandaı narazylyq bolmasa da, bılik Kerekýge qazaqy at berýge asyǵar emes. Tipti, bir jyldary belsendilerdiń «Pavlodardy Nurshahar dep ataıyq» degen usynysyna da ılikpedi.

El Táýelsizdiginiń 25 jyldyǵymen qatar, Ult-azattyq kóterilistiń 100 jyldyǵy, Isataı-Mahambet bastaǵan kóterilistiń 180 jyldyǵy, Alash arysy Álıhan Bókeıhannyń 150 jyldyǵy, Ult ustazy Ybyraı Altynsarınnyń 175 jyldyǵy, taǵy basqa ataýly datalardy paıdalanyp, birqatar eldi-mekenderdiń oryssha ataýlaryn ózgertip alsaq artyq bolmas edi.