Almatyda abaqtyda Natalá Slekıshınany zorlady dep aıyptalǵan túrme baqylaýshysyna qatysty sot úkimi shyqty, - dep habarlaıdy Qamshy.kz Tengrinews.kz –ke silteme jasap. Túrksib aýdandyq soty 37 jastaǵy LA-155/18 qylmystyq-atqarý júıesi departamentiniń qyzmetkerleri Rýslan Hákimovti toǵyz jylǵa bas bostandyǵynan aıyrdy.
Sottalýshynyń múlki tárkilenip, maıor ataǵynan aıyryldy. Sonymen qatar, Hákimovke ómir boıyna memlekettik qyzmette jumys isteýge tyıym salyndy. Sot úkimin sýdıa Aısara Jylqybaeva shyǵardy.
Slekıshınanyń ózi bul úkimge rızashylyǵyn bildirdi.
Eske salaıyq, Almatyda tergeý abaqtysynyń qyzmetkerleri jazasyn ótep jatqan áıeldi jabylyp zorlady dep aıyptalǵan bolatyn. Bul oqıǵadan jábirlenýshi sol Slekıshına bolyp shyǵady. 32 jastaǵy Natalá Slekıshına 155/18 mekemesinde jatqanda 4 azamattyń jynystyq qatynasqa májbúrlegenin aıtqan. Ol tipti sol kezde júkti bolyp qalǵan. Al qylmystyq atqarý júıesiniń qyzmetkerleri taǵylǵan aıyppen kelispeıtinin aıtyp otyr. Aıta keteıik, kiná taǵylyp otyrǵan 4 azamat ta osy mekemede uzaq ýaqyttan beri qyzmet etip keledi. Báriniń jasy 35-ten asqan. Bala-shaǵalary da bar. Natalány 4 birdeı qyzmetker birneshe ret zorlaǵan. Keıin arnaıy saraptama taǵaıyndalyp, balanyń ákesi rasymen túrme baqylaýshysy Rýslan Hákimov ekeni anyqtalǵan bolatyn.
"Memlekettik aıyptaýshy jańa aıyptaý aktisin toltyrdy, onda sottalýshyǵa myna baptar boıynsha jańa aıyp taǵyldy: QR Qylmystyq kodeksiniń 362-babynyń 4-bóliginiń 4-pýnkti (Bılikti nemese laýazymdyq ókilettikterdi asyra paıdalaný), 120-babynyń 2-bóliginiń 2-pýnkti (óltirý qaterin tóndirýmen ulasqan, sondaı-aq jábirlenýshige nemese basqa adamdarǵa qatysty asa qatygezdikpen jasalǵan zorlaý áreketi), 146-babynyń 2-bóliginiń 2-pýnkti (Birneshe ret azaptaý). 21 qazanda memlekettik aıyptaýshy sot prosesinde taraptarǵa jańa aıyptaýlardy baıandady", - dep túsindirdi baspasóz qyzmetindegiler.
