Aqtóbede Qarttar kúni merekesi ataýsyz qalǵan joq. Ásirese, jergilikti erli-zaıyptylardyń jaıǵan dastarhany qarttardyń kóńilin kóterip tastady,- dep habarlaıdy Qamshy.kz Nur.kz-ke silteme jasap.

Erhan Begimbetov pen Gúlfaıyz Ábdiresheva qarıalardyń ómirindegi ataýly merekeni umyt qaldyrmapty. Olar ózderi ıelik etetin "El-mura" meıramhanasynyń bir kúnin qazynaly qarttarǵa arnady.

Erli-zaıyptylar arnaıy mekemeden qaladaǵy qarıalardyń tizimin alyp, jıyrmaǵa jýyq qartqa keń dastarhan jaıdy. Dastarhan basynda óz zamandastarymen shúıirkelese ketken qarttar bı bılep, án shyrqap otyrdy.

"Mundaı dastarhan jaıý kópten beri oıymda júrgen. Biz dataly merekelerdi keń kólemde atap ótemiz. Al qarttar kúni kóp jaǵdaıda eleýsiz qalyp qoıady. Jasy kelgen qarıalardy qurmet tutý bizdiń paryzymyz dep bilemin. Búgingi merekege qarıalardyń ádemi kóılegi men oıýly qamzolyn kıip kelgeniniń ózi qandaı qýanysh? Kúıbeń tirlikten bas kótermeı júrgende qarıalarymyzdy baǵalaýdy umytyp ta ketemiz. Sondyqtan, búgin arqamnan júk túskendeı bolyp, qarıalardyń qýanyshyna marqaıyp qaldym", - deıdi Gúlfaıyz Ábdiresheva.

Otyrys sońynda qonaqqa kelgen qarıalardyń barlyǵyna shaǵyn syılyqtar taratyldy. Aqtóbelik erli-zaıyptylar mundaı ıgilikti isterin odan ári jalǵastyrmaq.