Qazaqstan jaýyngerleri 14-sáýirden bastap Astanadaǵy «Qa­zaq eli» eskertkishi aldyndaǵy alańda bolatyn áskerı sherýge qyzý daıyndalyp jatyr. Sherý 7-mamyrdaǵy Otan qorǵaýshylar kúnine oraı ótkiziledi. Elimizdiń abyroıyn asqaqtatatyn osynaý sharaǵa 2 myńǵa jýyq jaıaý ásker qatysqaly otyr. 

Olardyń tórtten úshin Qazaqstan Qarýly Kúshteriniń jaýyngerleri quraıdy. Áskerı saltanattyń ajaryn kirgizý úshin, Astanaǵa basqa óńirlerden 250-ge jýyq soǵys tehnıkasy jetkizilgen. Sonymen qatar 56 ushaq pen tikushaq sarbazdar sap túzegen alańnyń aspanynda samǵamaq. Áskerı kolonnany basqarýǵa 566 adamnan quralǵan ekıpajdar, júrgizýshiler, mehanıkter, desanttar toby quryldy. Olar áskerı sherý kezinde ózderi otyrǵan kólikter men tehnıkalardyń tut­qasy men tizginin ustaıdy. Bul áskerı sherýdiń burynǵylardan erek­sheligi – oǵan jańa ­zamanaýı tehnıkalar qatystyrylyp, kópshi­likke tanystyrylady. Qor­ǵanys mınıstrliginiń habarlaýyn­sha olardyń arasynda otandyq óndiris oryndary shyǵarǵan áskerı tehnıkalar da bar. Kúndelikti áskerı daıyndyq 4-5 saǵatqa sozylady. 200 adamnan quralǵan orkestrdiń súıemel­deýimen jaýyngerlerdiń sap túzeýi, júris-turysy, aıaq alysy jiti baqy­laýǵa alynyp, sarbazdar shashaý shyǵarmaıtyndaı daıyndyqqa keltirildi. Táýelsiz Qazaqstan armıasy­nyń qýat-kúshin, aıbynyn pash ete­tin bul saltanatty sharaǵa Qor­ǵanys mınıstrliginiń, İshki is­ter mınıstrliginiń, Tótenshe jaǵ­daılar mınıstrliginiń, Ulttyq qaýip­sizdik komıteti Shekara qyzmetiniń jáne Respýblıkalyq Ulannyń qurylymdary qatysady. Áskerı sherýdiń aıbatyn asyrý úshin elimizdiń ár túkpirindegi bólimshelerden keń jaýyryndy, uzyn boıly, qımyl-qozǵalysy shıraq jigitter iriktelgen. Sonymen birge áskerı sherýge qatysý úshin dene daıarlyǵy men moraldyq-psıhologıalyq rýhy myqty seksen bes  qyz-kelinshek tańdap alynǵan. Áskerı sherý Qorǵanys mı­nıstrliginiń 2014 jylǵa arnal­ǵan búdjeti esebinen qarjy­lan­dyrylyp otyr. Al saltanatty sherý bolatyn kúni Astana qala­synyń birqatar kóshelerindegi kólik qozǵalysy toqtaıtyny aldyn ala habarlandy. Áskerı sherý Keńes ókimeti 1945 jyly nemis áskerin tolyq talqandaǵannan soń jyl saıyn ótkiziletin turaqty dástúrge aınaldy. Sonymen birge mundaı she­rý iri-iri áskerı jattyǵýlardan keıin de ótkiziledi. Qazaqstandaǵy iri kólemdegi tuńǵysh áskerı sherý 1992 jyldyń 7-mamyrynda boldy. Alǵashqy áskerı sherýdi Qazaqstannyń tuńǵysh Qorǵanys mınıstri, Halyq Qaharmany, Keńes Odaǵynyń Batyry Saǵadat Nurmaǵambetov qabyldady. Al eń iri áskerı sherý byltyr ót­ken bolatyn. 2013 jyldyń 7-ma­myryndaǵy áskerı sherýdiń orny retinde Otardaǵy 40-ynshy áskerı baza polıgony tańdalyp, oǵan 7 myńǵa jýyq jaýynger, 500-den asa áskerı tehnıka jáne 86 ushaq pen tikushaq jumyldyryldy. Ony tamashalaýǵa alys-jaqyn elderden kóptegen qonaqtar kelgen edi. Jaýyngerlerdiń sany da, áskerı tehnıkalardyń sany da ótken jylǵydan az. ­Desek te, joǵaryda aıtqandaı ás­kerı tehnıkalarymyzdyń sapasy jaqsardy. Oǵan qosa jaýyn­gerlerimizdiń de rýhy kóterildi dep oılaımyz. Óıtkeni sarbazdardyń kóbi táýelsizdikpen qurdas jáne táýelsizdik alǵannan keıin ómirge kelgen býyndar. Sondyqtan búgingi jaýyngerlerdiń alymy da, qarymy da burynǵylardan áldeqaıda joǵary.

Beıbit Nálibaev