Astanadaǵy Esil aýdandyq №2 sotynda QR Jýrnalıser odaǵy tóraǵasy Seıitqazy Mataev pen onyń uly, «QazTAG» HAA-nyń basshysy Áset Mataevtyń isi boıynsha úkim oqyldy, - dep habarlaıdy Qamshy.kz.

«S. Mataev QR Qylmystyq kodeksiniń 245-baby, 3-tarmaǵy, 190-baby 4-tarmaǵy boıynsha kináli dep tanylyp, jıyntyǵy 6 jylǵa bas bostandyǵynan aıyrylsyn. Á. Mataev QR Qylmystyq kodeksiniń 190-baby 4-tarmaǵy boıynsha kináli dep tanylyp, 5 jylǵa bas bostandyǵynan aıyrylsyn», - dedi úkimdi oqyǵan sýdıa Aqbolat Qurmantaev.

Sondaı-aq, eki sottalýshynyń da múlki tárkilenip, ekeýi de ómir boıy basshylyq laýazymdar ıelený quqyǵynan aıyryldy.

Sot úkimi oqylǵanǵa deıin S. Mataevtyń ózi «Eshqandaı «ǵajaıyp» kútpeımiz. Biraq, biz ózimizdi kináli dep sanamaımyz. Biz bul sheshimge de shaǵymdanamyz. Qoldaý bildirip kelgenderge alǵys aıtamyn. Osynsha qıyndyqqa tózgen Ásetke, meniń otbasyma, advokatyma alǵys aıtý kerekpiz», - degen bolatyn.  

Buǵan deıin sottaǵy jaryssóz kezeńinde prokýror Erjan Quraqbaev sýdıadan Seıitqazy Mataevty 6 jyl 8 aıǵa, Áset Mataevty 6 jylǵa sottaýdy suraǵan edi.

Úkim oqylǵan soń Mataevtardyń advokaty Madına Bakıeva úkimge qarsy shaǵym beretinin habarlady.

Prokýror sonymen qatar Seıitqazy Mataevtyń kásipkerlikpen aınalysýyna 3 jylǵa deıin tyıym salýdy, aqparattandyrý jáne baılanys komıteti men «Qazaqtelekom» kompanıasyna olardyń shaǵymy boıynsha 169 mıllıon teńge óndirip berýdi jáne «tólenbegen salyq» retinde 216 mıllıon teńge óndirýdi surady.

Bıyl 22 aqpanda «memleket qarjysyn jymqyrǵan» jáne «salyqtan jaltarǵan» degen kúdikpen ustalǵan Seıitqazy Mataev 24 aqpanda úıqamaqqa alynǵan. 28 naýryzda Áset Mataev ta úıqamaqqa alyndy.

Ákeli-balaly Mataevtarǵa qatysty sot prosesi Astanada 23 tamyzda bastalǵan.