Rýdnyıda qylmyskerler kúzetshige jáne onyń vagondaǵy dosyna shabýyl jasap, uryp-soǵyp, ústilerine janarmaı quıyp, órtep jibergen. Bul týraly oblystyq sottyń baspasóz qyzmetine silteme jasap Qostanaı tańy basylymy málimdedi,- dep habarlaıdy Qamshy.kz .
"Aıyptaý boljamyna sáıkes, bes jas jigit Rýdnyıdaǵy kafelerdiń birinde araq iship alǵan. Olardyń biri "SSKÓB" AQ karerinde qara jáne tústi metal jınaýshy bolyp jumys istegen. Jigitterdiń biri qasyndaǵylarǵa metal urlaýǵa usynys jasaıdy. Bótelkelesteri kelise ketip, taksı shaqyryp, dárihanaǵa barady.
Odan medısınalyq maska men skoch satyp alyp, ári qaraı baý-baqshalyq sharýashylyqqa bet alady. Sol jerde ornalasqan arnaıy vagonda kúzetshi dosymen birge alańsyz otyrǵan. Qaskúnemder ishke kirip, olardan qoıma kiltin talap etip, soqqyǵa jyǵady. Alaıda kúzetshide kilt bolmaǵan. Sol kezde qylmyskerler qurbandaryn dalaǵa alyp shyǵyp, qol-aıaqtaryn skochpen matap, ústilerine janarmaı quıyp, órtep jibergen.
Keıin órtti sóndirip, aıypkerler jalpy quny 96 myń bolatyn 80 keli metal synyqtaryn urlaıdy. Al jábirlenýshilerdi es-jady bar kúıinde brıgada jumysshylary taýyp alyp, Rýdnyı qalalyq aýrýhanasyna jetkizdi. Alaıda olar komaǵa enip, esterin jımaǵan qalpynda jan tapsyrdy", - delingen habarlamada.
Marqumdar ólim aldynda polıseılerge qylmyskerler týraly aıtyp úlgergen. Tártip saqshylary jedel iske kirisip, kúdiktilerdi qolǵa túsirdi.
