"Uly Otan soǵysyn" atap ótý dástúri búgingi bılikpen birge qurdymǵa ketedi. Óıtkeni, el basqaratyn kelesi býyn oǵan qarjy bólýdi, aqshany tekke shashý, kelmeske ketken ımperıanyń jetistigin jyrlaý dep qabyldaıdy. Dál solaı bolaryna kámil senimdimin. Bul merekeni Keńes odaǵynyń birden-bir murageri sanalatyn Reseı ımperıasy óziniń «odaqtastaryna» kúshtep tanyp otyr. Sondyqtan, «nostalgıamen» ómir súretin bıliktegi komýnıser odan bas tartýǵa jol bermeıdi. Buryn 9 mamyrdy sońǵy ardager qalǵansha toılaıtyn «shartty mereke» shyǵar dep oılaýshy edim. Biraq, sol soldattardyń qolymen ót kósegen komýnıserge ardagerlerdiń qatary sırep bara jatqany da qajet emes ekenine kózim jetti. Bul eń aldymen, sondaı alyp ımperıanyń ydyrap ketkenine áli kúnge deıin barmaq tisteıtinderdiń bas merekesi. Pýtınniń osyǵan baılanysty bylaı dep ókingeni bar: «Sovet odaǵynyń ydyraýy- XX ǵasyrdaǵy eń úlken geo-saıası apat boldy».  Al, buıryqqa baǵynyp, syn saǵatta soǵysqa suranyp, «Otandy» qorǵaýǵa attanǵan erjúrek jaýyngerlerge meniń qaı-qashanda qurmetim sheksiz. Olar ózine júktelgen mısıany artyǵymen oryndady. Sondyqtan ardagerlerge qurmet kórseteıik. Olar ózderiniń "beker soǵysqanyn" bilmeı ótsin.

  Aıtpaqshy, komýnıstik estafetany úzgisi kelmegen shovınıser «bessmertnyı polk» dep atalatyn taǵy bir bastama oılap taýypty. Endi aldaǵy bir-eki jylda ardagerlerden kózi tiri eshkim qalmaıdy. Biraq, olardyń ornyna balalary men nemereleri sherýge shyǵyp, jeńis merekesin atap ótýdi ary qaraı jalǵastyra bermekshi. Almatynyń ákimdigi bul ıdeıadan birden bas tartypty. Biraq, aksıa elimizdiń basqa qalalarynda ótip jatyr. Bul vırýsqa qazirden bastap tyıym salmasaq, aqyr zamanǵa deıin jeńis merekesimen jeligip júre beremiz...

Jolymbet Mákishev

Táýelsiz jýrnalıser qaýymdastyǵynyń prezıdenti