Búgin Parlament Májilisiniń jalpy otyrysynda depýtattar palata búrosy usynǵan birqatar zań jobalaryn talqylady. Otyrys sońyna qaraı ózderiniń saýaldaryn Úkimetke joldaǵan halyq qalaýlarynyń biri - Ońalsyn Jumabekov osyndaı málimdeme jasady, dep habarlaıdy BAQ.kz
Ońalsyn Jumabekov óz sózinde: "Meniń saýalym Premer-mınınstr Kárim Másimovke baǵyttalady. Elimizdiń bas qalasy Astanadaǵy Esildiń ol jaǵalaýyna jańadan úıler salyna bastaǵan kezde, mundaǵy birneshe kóshelerge eski qalalardyń ataýy berldi. Olar: Túrkistan, Saraıshyq, Saýran, Syǵanaq, Aqmeshit jáne Orynbor kósheleri. Tarıhı turǵydan qaraǵanda bul óte oryndy sheshim. Al endi búgingi tańda Orynbor qalasy basqa memlekettiń, Reseı Federasıasynyń kóptegen oblys ortalyqtarynyń biri. Búginde elordamyz Astanada eki birdeı bas kósheler qalyptasqan. Olar – Qazaq Eli monýmenti ornalasqan Táýelsizdik dańǵyly men joǵaryda atalǵan Orynbor kóshesi. Sońǵy kóshede mınıstrlikter úıi, Bas prokýratýra, Ulttyq qaýipsizdik komıteti ornalasqan. Kóshe tikeleı Astana áýejaıyna shyǵady. Kóptegen shet eldik resmı delegasıalar da osy kóshemen júredi. Eń bastysy – bul kóshede Respýblıka Prezıdenti, Ult kóshbasshysynyń bastamasymen turǵyzylǵan «Máńgilik El» saltanat qaqpasy ornalasqan. Bul qaqpanyń munda ornalasýynyń ózindik sımvolıkalyq máni bar. Ol halqymyzdyń máńgilik bolashaǵyn, máńgilik murattary men máńgilik elordasy men máńgilik Táýelsizidigin rámizdeıdi. Iaǵnı, bul kóshe óz elimizdiń sımvoldarynyń biri bolyp tur. Sondyqtan, elimizdiń bas kóshesi basqa memlekette ornalasqan qalanyń ataýymen atalǵany durys emes dep sanaımyn. Elbasymyz «Qazaqstan Strategıasy – 2050. Bir maqsat, bir múdde, bir bolashaq» atty Joldaýynda: «biz armandardy aqıqatqa aınaldyrdyq. Máńgilik eldiń irgetasyn qaladyq» degen sózderin elimiz álem moıyndaǵan jetistikterge XXI ǵasyr bastalyp jatqan kezde jetkenin eskere otyryp, Astana qalasyndaǵy Orynbor kóshesiniń ataýyn «Altyn ǵasyr» dańǵyly dep ózgertýdi usynamyn. Orynbor qalasyn eskerýsiz qaldyrmaý úshin jyldan-jylǵa ósip, keńeıip kele jatqan Astana qalasyndaǵy jańa kóshelerdiń bireýin ataýǵa bolady dep oılaımyn, - dedi depýtat.
Esterińizge sala keteıik, 1920 jyly 4 qazanda Orynborda Qazaq ólkesi Keńesteriniń quryltaı sezi ótip, Qazaq AKSR-i qurylǵan. Al Orynbor qalasy sol kezdegi Qazaq AKSR-iniń 1920-1925 jyldar aralyǵynda astanasy hám bas qalasy bolǵan.
Tek bul ǵana emes, Reseımen baılanysty nysandar basqa aımaqtarda da kóp. Máselen, elimizdiń ońtústik astanasy - Almatyda "Máskeý" atty metrostansıa salynyp jatyr. Sonymen qatar, reseılik erekshelikterdi bildiretin basqa da oryndar, saýda úıleri bar. Mırzoıan kóshesiniń aty tóńireginde biraz daý shyǵyp, keıin basylǵan-dy.
