Túrkıadaǵa shahtada bolǵan apatqa baılanysty úsh kún qaraly dep jarıalandy, dep habarlady 24kz Bul týraly eldiń Premer-Mınıstriniń resmı saıtynda jarıalandy. Qazirge deıin apattan ajal qushqan adam sany 205-ke jetip, 80-ge jýyq jumysshyǵa aýrýhanada dárigerlik kómek kórsetilýde. Buǵan deıin aqparat kózderi 201 adamnyń qaza tapqany jaıly habarlaǵan bolatyn. Qurbandar qatary áli de kóbeıýi múmkin. Esterińizge sala keteıik, Ystambuldan 250 shaqyrym jerdegi Soma qalasyndaǵy ken ornynda elektr jelisiniń tuıyqtalýynan órt shyǵyp, sońy joıqyn jarylysqa ulasty. Apat kezinde jer astynda 780-ge jýyq kenshi bolǵan. Olardyń 280-i jer betine ózderi aman shyqqan. Shahtada qalǵan júzdegen adamnyń jaǵdaıy beımálim. Qazir oqıǵa ornynda shuǵyl túrde qutqarý-izdestirý júrgizilýde.