Mamyrdyń 29-ynda Astanada ótetin keńes samıtinde úsh taraptyq kelisimshartqa qol qoıylady.  "Ekonomıka" gazetiniń jazýynsha, bul kelisimshart  800 betten turady. 

   Eýrazıalyq ekonomıkalyq odaq qurý týraly ıdeıany 1994 jyly Máskeý memlekettik ýnıversıtetinde dáris oqyǵan kezde Qazaqstan memleketiniń  basshysy Nursultan Ábishuly Nazarbaev usynyp, álemdik qaýymdastyqqa jarıa etken bolatyn. Taraptardyń uıǵarýynsha, Eýrazıalyq ekonomıkalyq odaq 2015 jyldyń 1 qańtarynan bastap jumys isteýge múddeli. Sol úshin de  Qazaqstan, Reseı jáne Belorýssıa basshylary osy jyldyń mamyrynyń 29-ynda Astana qalasynda ótetin  joǵarǵy Eýrazıalyq ekonomıkalyq keńes samıtinde bul odaqtyń qurylýy  jaıyndaǵy kelissózge qol qoıatyn bolady. Árıne, Astanada ótetin joǵarǵy Eýrazıalyq ekonomıkalyq keńes samıtiniń jumysyna da kóp salmaq artylatyny óz-ózinen túsinikti. Óıtkeni, kelesi jyldyń basynan bastap jumys isteýge tıisti bul ekonomıkalyq odaqtyń  túıtkili kóp, kúrmeýi qıyn máselelerin ár tarapqa ońtaıly ári durys sheshý úshin ózara túsinistik pen múddeliliktiń qajet ekendigin eshkim joqqa shyǵarmaıdy. Osy oraıda ústimizdegi jyldyń sáýir aıynyń 29-ynda Mınsk qalasynda ótken Eýrazıalyq ekonomıkalyq odaq elderi basshylarynyń samıtinde qandaı máse­lelerdiń kóterilgeni de eske túsedi. Mınsk samıtinde Qazaqstan, Reseı jáne Belarýs Prezıdentteri Eýrazıalyq odaqtyń aldaǵy atqa­ratyn jumystary men bolashaǵyn qyzý talqylady. Derek kózderi habarlaǵanyndaı, Eýrazıalyq odaqtyń basshylary 800 betten turatyn tıisti qujattarǵa mamyrdyń sońyna taman qol qoıatyn bolyp tarasqan edi.

"Ekonomıka" gazetinen yqshamdalyp alyndy