Aktrısa 72 jasynda dúnıeden ozdy. 44 jyl M.Áýezov teatrynyń sahnasynda óner kórsetken aktrısanyń artynda qalǵan jaqyndaryna teatr ujymy qaıǵyryp kóńil aıtady.
23 mamyr Almaty oblsy “Nura” aýylynda aktrısany aqtyq saparǵa shyǵaryp salý rásimi ótedi.
1942 jyldyń 20 aqpanynda dúnıege kelgen aktrısa Turahan Sadyqova, Ulttyq «Qulager» kınosyılyǵynyń ıegeri. Almaty oblysy Raıymbek (burynǵy Narynqol) aýdany Qarasazda dúnıege kelgen.
Orta mektepti bitirgen soń Narynqol halyq teatrynda eńbek etti. S. Adambekov pesasy boıynsha qoıǵan «Kún men kóleńke» spektaklindegi Shoqbıke roli úshin Respýblıkalyq baıqaýda 1 dárejeli dıplommen marapattaldy.
1966-1968 jj. M. Áýezov atyndaǵy akademıalyq drama teatr janyndaǵy stýdıany oqyp-bitirip, osy teatrǵa rejıserdiń kómekshisi qyzmetine alyndy, 1970 j. akterlik quramǵa aýystyryldy.
1979-1984 jj. Respýblıkalyq P .Chaıkovskıı atyndaǵy mýzyka ýchılıshesiniń prıma-qobyz klasyn,1999-2002 jj. Kókshetaý Gýmanıtarlyq-ekonomıkalyq ýnıversıtetiniń psıhologıa fakúltetin syrttaı oqyp bitirdi.
Úlken sahnadaǵy alǵashqy eńbegi M. Áýezovtiń «Qaragózindegi» Aqbala. Odan beri kóptegen rol oryndady. Atap aıtqanda, Q. Shańǵytbaev, Q. Baıseıitovtiń «Beý, qyzdar-aı!» komedıasynda Gúlshara, N. Hıkmettiń «Farhad-SHyrynynda» Kútýshi, Sh. Aıtmatovtyń «Ana-Jer-anasynda» kórshi áıel, Uıǵyn men I. Sultanovtyń «Álisher Naýaıinde» Enaga, Q. Muqashevtiń «Jamalynda» áıel, «Partorgynda» Qatıra, Sh. Qusaıynovtyń «Aldarkósesinde» Aldarkóseniń áıeli, Ǵ. Músirepovtiń «Amangeldisinde» Zamana, Iran-Ǵaıyptyń «Shyńǵysqanynda» Ketbuǵa jyraý, A. Súleımenovtiń «Kek» drama-dıalogynda Arýaq-eles, T. Nurmaǵambetovtiń «Kempirlerden shyqqan daýynda» Muǵalıma áıel, sondaı-aq Shekspırdiń «Asaýǵa-tusaýynda» traktırshi áıel, B. Brehttiń «Toǵyshardyń toıynda» Ana, t.b.
Roldiń úlken-kishiligine qaramastan aktrısa ár keıipkeriniń daralyǵyn tabýǵa umtyldy, ásirese, halyqtyq minez-qulyq sıpattaryn tushymdy asha bildi. Al kıeli qobyz ónerin jaqsy meńgerýi jáne qıal ushqyrlyǵy «Amangeldi», «Shyńǵys han», taǵy basqa qoıylymdarda rejıserlerdiń oı-ıdeıasyn damyta, baıyta túsýge úlken úles qosty. «Shyńǵys han» qoıylymyndaǵy Ketbuǵa jyraý roli úshin aktrısa dástúrli «Teatr kóktemi» festıvaliniń júldesine ıe boldy.
Aktrısanyń talanty jarqyraı túsken sala – kıno óneri. Kınodaǵy jolyn «Birge» (rej. L. Aranysheva, 1988) fılminen bastaǵan aktrısa «Tolǵanaı» fılminde Qalpaqty áıel (rej. N. Chankova, 1989), «Otyrardyń kúıreýinde» (rej.A. Ámirqulov, 1991) Ilvashanyń áıeli, «Ekeýde» Poshtashy, «Sergeldeńde» (rej. S. Apyrymov, 1993) Táýip, «Stalınge syılyqta» (rej. R. Ábdirashev) Baqsy áıel, «Jel-adamda» (rej. Q. Ahmetov) júz jasaǵan Keıýana, «Aýylym – ánimde» Ana, «Trassada» qoıshy áıel (rej. S. Qurmanbekov), «Myń balada» soqyr kempir (rej. A. Sataev), «Nemerede» Ana, t.b.; sondaı-aq sheteldik kınogerlerdiń «Uljan» (rej. F. Shlendorf), «GAZ. Orys mashınalary» (rej. T. Bekmambetov, B. Qılybaev), «Baıqońyr» (rej. F. Helmer), «Dala» (rej. M. Brodskıı), CaspioNet agenttiginiń 20-serıaly «Qazaqstan, men seni súıemin» telefılminiń «Sút, qaımaq, irimshik» atty serıalaryna (rej.E. Gılman) tústi.
T.Sydyqova Umaı ana rolin oryndaǵan kınorejısser E. Tursynovtyń «Kelin» kórkem fılmi 2009 jyly Amerıka Kıno Akademıasynyń «Oskar» syılyǵyna usynylyp, úzdik toǵyzdyqqa ilindi. Osy roli úshin aktrısa QR Kınogerler Odaǵynyń «Qulager» Ulttyq kınosyılyǵyna ıe boldy.
Aktrısa 72 jasynda dúnıeden ozdy. 44 jyl M.Áýezov teatrynyń sahnasynda óner kórsetken aktrısanyń artynda qalǵan jaqyndaryna teatr ujymy qaıǵyryp kóńil aıtady.
