QR Parlamentiniń tómengi palatasynyń depýtattary sottyń sheshimi men Qazaqstanda ólim jazasyna engizilgen moratorııdi alyp tastaýdyń qajettiligi týraly máseleni talqylady, - dep habarlaıdy Tengrinews.kz.
Búgin, 2 qarashada Almatyda bıyl jazda terakt uıymdastyrǵan Rýslan Kúlekbaevqa qatysty úkim shyǵaryldy. Sýdıa sottalýshyǵa úkimdi Astanada Parlamenttiń tómengi palatasynyń otyrysy ótip jatqanda oqydy.
"Ólim jazasyn oryndaý máselesine kelgende kúmánim bar. Menińshe, adam ómirge óz betinshe kele salmaıdy. Ómir - qudaıdyń syıy. Osy oraıda adamnyń basqa bir adamnyń ómirin qıýǵa quqyqtyq emes, moraldyq turǵyda quqyǵy bar degenge kúmánmen qaraımyn. Iá, ol sumdyq qylmysker, jaýyz - tapa-tal túste birneshe adamdy óltirdi. Biraq budan da aýyr qylmystar bar, zorlaıdy, óltiredi degendeı. Mundaı jaǵdaıda qoǵam ólim jazasyn aqtap alady. Alaıda ólim jazasy mundaı jaýyzdyq úshin tym ońaı jaza bolyp kórinedi. Olarǵa ómir boıynda qınaý, aýyr jaǵdaıda qaldyrý jáne ómiriniń sońyna deıin ókinýmen ótkeni durysyraq pa dep oılaımyn", - dep bildirdi pikirin depýtat Azat Perýashev.
"Ókinishke qaraı, tájirıbeden kórip otyrǵanymyzdaı, jazanyń jeńil nemese aýyr bolýy qylmystyń qaıtalanýynyń aldyn ala almaıdy. Keńes kezinde eń aýyr jazalar boldy, biraq qylmys joǵary deńgeıde qalyp qoıdy", - dedi Perýashev "Kúlekbaevqa qatysty ólim jazasyn oryndaý úshin moratorııdi alyp tastaýǵa bola ma?" degen suraqqa jaýap bere otyryp.
"Anasynyń, áıelderdiń, respýblıka azamatynyń kózqarasy boıynsha aıtsaq, árıne, biz qaýipsizdiktiń bolǵanyn qalaımyz, mundaı jaǵdaılardyń qaıtalanbaýyn qalaımyz. Soǵan qaraǵanda, mundaı jaza ádil de shyǵar. Al zańnama turǵysynan qarap kórsek, bizde moratorıı bar. Eger sot osyndaı sheshim shyǵarsa, oǵan qarsy bola almaımyn. Al adamgershilik jaǵynan alyp qarasaq, mundaı jaýyzdyq úshin eń aýyr jaza taǵaıyndalǵany durys", - dep bildirdi kózqarasyn depýtat Maıra Aısına.
"Menińshe, úkim ádil, sebebi mundaı terorıstik qylmysty aqtap alýǵa bolmaıdy. Úkim Qazaqstan zańynyń negizinde júzege asyryldy, bul zań ólim jazasyn qarastyrady. Biraq qaıtalap aıtamyn, bul jaǵdaıda moratorııge baılanysty úkimdi oryndaýdyń múmkin emestigi negizgi másele bolyp qalyp otyr, sondyqtan ol ómir boıyna bas bostandyǵynan aıyrý jazasyna aýystyrylady", - dep atap ótti tómengi palatanyń depýtaty Máýlen Áshimbaev.
"Moratorıı barlyǵyna birdeı, moratorııde bireý-mireýge qatysty toqtaýdy qarastyrmaıdy. Sondyqta osy jaǵdaıda moratorıı barlyǵyna birdeı qoldanylady", - dep málimdedi Áshimbaev "Almatylyq atqyshqa" qatysty moratorııdi toqtata turýǵa bola ma?" degen saýalǵa jaýap bere otyryp.
"Menińshe, Qazaqstan Ekonomıkalyq yntymaqtastyq jáne damý uıymynyń 30-dyǵyna talpynyp jatqanda muny jasaý múmkin emes, bul elderde ólim jazasy joq. Sondyqtan, úkim bar, biraq ony oryndaý qıyn", - dedi komýnıser fraksıasynyń depýtaty Aıqyn Qońyrov.
"Eger moratorıı alyp tastalsa, el abyroıyna nuqsan keledi. Sondyqtan, meniń pikirimshe, moratorıı alyp tastalmaıdy", - dedi depýtat Qońyrov.
Aıta keteıik, búgin almatylyq atqysh ólim jazasyna kesildi. Biraq ony oryndaýǵa elimizde moratorıı jarıalanǵan.
Eske salaıyq, 18 shildede Almatyda terorıstik akt bolǵan edi. Belgisiz er adam Almaly aýdandyq İİB men UQK departamentine qarýly shabýyl jasady. Oqıǵa saldarynan bes adam, onyń ishinde úsh polısıa qyzmetkeri qaza tapty. Qalada terrorlyq qaterdiń qyzyl deńgeıi jarıalandy. Qylmysker ustaldy,ol buryn isti bolǵan Qyzylorda oblysynyń týmasy Rýslan Kúlekbaev bolyp shyqty.
