Kúıeýi Baqytbek Esentaevtyń 9 jylǵa bas bostandyǵynan aıyrylǵanyna qatysty Baıan Esentaeva ınstagram paraqshasynda óz pikirin bildirdi,- dep habarlaıdy Qamshy.kz.
Prodúser onda bylaı dep jazǵan: «Men keshirgenimmen, zań keshirmedi. Ómir osylaı, bizdiń jáne balalarymyzdyń taǵdyry osylaı boldy. Bolǵan oqıǵa úshin bir-birimizdi túsine almaǵanymyz, balalardyń kóz jasy, oılanbaı jasaǵan sheshimdir úshin meniń janym aýyrýda. Men synǵa, qoǵamnyń pikirine úırenip ketkeli qashan, árdaıym teris pikirdegi adamdar bolady, eshkim óz ómirin boljaı almaıdy, bárimiz de pendemiz, árqaısysymyzdyń qatelesýge qaqymyz bar. Ómirimde oryn alǵan bul oqıǵanyń durys-burystyǵyn bilmeımin, muny tek ýaqyt kórsetedi. Júrektiń aqylǵa baǵynbaıtyn kezi bolady, meniń basymda da osyndaı jaǵdaı. Árqaısysymyz óz jazamyzdy aldyq. Zań bárine birdeı. 22 jyl birge turǵan ómirimizde, onyń jaqsy áke ekenin senimdi túrde aıta alamyn. Árıne balalardy jalǵyz tárbıeleý maǵan qıyn, biraq men bárine shydaımyn, bárine de tózemin! Men eshqashan ózime qurban adam retinde sanaǵan emespin. Meniń jáne meniń burynǵy jarymnyń hıkaıasy aıaqtalmaǵanyna senimdimin, ol óte myqty adam, oǵan densaýlyq pen kúsh-qaırat tileımin, alda jaqsy ómirge degen úmit bar. Men aıtarymdy aıttym, osy máselege baılanysty BAQ ókilderiniń endi meni mazalamaýyn ótinemin!»
Esterińizge salsaq, búgin Taldyqorǵan qalasynda ótip jatqan Almaty oblysynyń qylmystyq ister jónindegi mamandandyrylǵan aýdanaralyq sotynda sýdıa Berikjan Baıjúnisov Baqytbek Esentaevqa qatysty sot úkimin jarıa etken bolatyn. Prodúserdiń burynǵy kúıeýi 9 jylǵa qatań rejimdi kolonıaǵa jiberildi. Alaıda Esentaevtyń ózi sot barysynda kináli emestigin aıtqan.Sondaı-aq, ol appelásıalyq shaǵym túsirmek.
