Almaty qalasynyń ákimi Baýyrjan Baıbek pen qalanyń bıznes qurylymdary ókilderi arasyndaǵy kezdesý aıasynda «AllurGroup» kompanıasy dırektorlar keńesiniń tóraǵasy Andreı Lavrentevpen ózara yntymaqtastyq týraly memorandýmǵa qol qoıyldy.

Kelisimge sáıkes, EKSPO-2017 bastalýyna deıin Almatyda elektromobılderge arnalǵan 40 elektrlik janarmaı quıý beketi ornatylady. Bul Qazaqstan Respýblıkasynyń 2013-2020 jyldarǵa arnalǵan «jasyl ekonomıkaǵa» ótý tujyrymynyń negizgi baǵyttarynyń biri. Sonymen birge, kompanıa testileýden ótkizý úshin 30 kún merzimge ákimdikke úsh elektromobıl berýdi josparlaýda.

«25 jyl ishinde Almatydaǵy kólikter sany úsh esege artty. Qazir qalada 570 myń avto bolsa, oblysta 270 myń kólik bar. Iaǵnı, kún saıyn 840 myń avto qalaǵa kirip-shyǵady. Sońǵy on jylda memleket Almaty kólik ınfraqurylymyna 500 mıllıard teńgege jýyq qarajat jumsaǵan», — dedi Baýyrjan Baıbek.

Ázirge, megapolıs ákimdigi 10 elektrojanarmaı beketin ornatý jumystaryn júrgizip jatyr, sonymen birge buryndary ornatylǵan jeke elektrojanarmaı beketteri bar.

«Egemen Qazaqstan» gazeti