Keshe Astana qalasyndaǵy «Qazaqstan» ortalyq konsert zalynda belgili bıshi Shuǵyla Saparǵalıdyń «Qazaǵym, barym sen úshin» atty jeke konserti ótti. Bul joly bı padıshasy opera da oryndap kórermenin tań qaldyrdy, — dep habarlaıdy BAQ.KZ tilshisi.
«Úkili arý», «Bórteniń bıi», «Aı nury» sıaqty bılerimen barsha jurtqa tanymal bıshiniń keshine eńkeıgen qarttan qundaqtaǵy balaǵa deıin kelip qatysty. Ǵajap qımyldy adamzat bolmysymen, ómir zańdylyǵymen baılanystyra biletin bıshiniń qoıylymdyq bıleri óner súıer qaýymdy tánti etti. Kórermenniń tipti de tańqalǵany Shuǵylanyń sahnaǵa birden «Time to Say Goodbye» ánin opera juldyzdarymen birge shyrqap shyqqany boldy. Halqymyz «Ónerliniń órisi keń» degendi beker aıtpasa kerek. Patrıottyq, lırıkalyq, zamanaýı ánderdi qınalmaı shyrqaǵan bı sheberi túriktiń ánin óz tilinde oryndap, tájiktiń ánin qytaısha tamyljytty.
Bar ónerin halqyna arnaǵan bıshi ózi baýlyp jatqan búldirshinderdi de úlken sahnaǵa shyǵardy. Sondaı-aq, keshte Shuǵylanyń ónerdegi dostary da óner kórsetti.
Bıimen tanylyp, ánimen tańǵaldyrǵan ónerpazdy ánge aýysyp ketýi múmkin degen kúmanǵa qaldyq kesh kezinde. Kókeıdegi saýalymyzǵa ekilenbeı jaýap bergen óner juldyzy: «Men óner adamymyn ǵoı. Sondyqtan án men bıdi qatar alyp júrýge shamam jetedi»,-dep túıdi.
Aldaǵy ýaqytta elde turaqty qalýdy ǵana kózdeıtinin jetkizgen Shuǵyla Saparǵalıqyzy josparyn da jasyrmady. «Jastardy búkil ónegre baýlıyn degen maqsatpen ashqan óner ortalyǵynyń jumysyn endi-endi bastap jatyrmyz. Aldaǵy ýaqytta jaz boıy el ishi-syrtynda ótetin kóptegen keshterim josparlanǵan. Soǵan qaramastan, kúz aıynda tuńǵysh án jınaǵymdy halyqqa usynamyn dep otyrmyn»,-deıdi ol.
