Memlekettik kóshi-qon jáne qazaq dıasporasy agenttigin qurý kezek kúttirmes másele. Búgin Májilistiń jalpy otyrysynda Úkimet basshysy Kárim Másimovtiń atyna joldaǵan depýtattyq saýalynda depýtat Nurlan Jazylbekov osy máseleni kóterdi.

Saýal barysynda depýtat jaqynda el Úkimeti sheteldegi qandastardy kóshirýdi jedeldetý maqsatynda quqyqtyq jáne ákimshilik tetikterdi ońtaılandyrýǵa baǵyttalǵan asa mańyzdy saıası sheshim qabyldaǵanyn atap ótti. Onyń paıymynsha, ulttyq memleketimizdi bekemdeý jolyndaǵy mundaı ıgi bastamalardyń durystyǵy daý týdyrmaıdy, biraq osy baǵyttaǵy sharalar áli de jetkiliksiz. Sebebi, depýtattyń oıynsha, shetelderde turatyn qazaq dıasporasynyń ulttyq bolmysyna tóngen qater jyl ótken saıyn aýyrlaı túsýde. Bul rette N. Jazylbekov mıllıonǵa jýyq qandastar turatyn kórshi Reseıde birde-bir qazaq mektebiniń joqtyǵyn, sondaı-aq Qytaı men Ózbekstanda qazaq mektepteri jyl saıyn jabylyp jatqanyn alǵa tartty. Sonymen qatar, Májilis depýtaty shettegi qandastarmen mádenı baılanysty kúsheıtýge mindettelgen Dúnıejúzi qazaqtary qaýymdastyǵynyń jumysyn da synǵa aldy.

«Olar bar bolǵany qoǵamdyq uıym ǵana. Sondyqtan da, memlekettik kóshi-qon jáne dıaspora agenttigin qurýdyń mańyzy erekshe. Izraıl, Reseı, Germanıa jáne Qytaı elderinde óz dıasporalarynyń quqyqtyq múddesin qorǵaýǵa baǵyttalǵan arnaıy memlekettik qurylymdar asa ónimdi jumys istep keledi», - deı kele depýtat N. Jazylbekov elimizde búginge deıin osyndaı orasan zor mindetti atqaratyn memlekettik organ joq ekendigine nazar aýdardy. «İshki ister mınıstrligindegi kóshi-qon departamentiniń qyzmeti tek vızalyq ruqsat berýmen shekteýli. Qoǵamdyq uıymdar mundaı júkti kótere almaıtyny da anyq. Sondyqtan qulashyn keńge silteıtin quzyreti bar Kóshi-qon jáne qazaq dıasporasy agenttigin qurý kúttirmes másele dep bilemiz. Qazaqstan Eýrazıalyq ekonomıkalyq odaqqa kirip otyrǵan sátte, sheteldegi qandastarymyzdy atamekenine tartý arqyly qanatymyzdy qataıtyp, keregemizdi keńeıte túsýdiń mańyzy úlken», - dedi depýtat.

kazinform.kz