Túrkıanyń burynǵy prezıdenti Kenan Evren ómir boıyna bas bostandyǵynan aıyryldy, - dep habarlaıdy Tengrinews.kz. 96 jastaǵy saıasatker bılikke qarsy qylmystary úshin kináli dep tanylǵan. Kenan Evren  1980 jyldyń 12 qyrkúıeginde memlekettik tóńkeristi uıymdastyrýshy sanalady. Ol kezde Evren armıanyń bas shtabynyń bastyǵy bolǵan. Osy oqıǵalardan soń ol jańa ákimshiliktiń basshysy, keıin prezıdent bolyp saılandy. Ol bılikke kele sala jappaı qýǵyn-súrgin jasaǵan. Resmı málimet boıynsha Evrenniń bastamasymen 178 myń adam tutqynǵa alynǵan, 64 myń adam túrmede otyrdy, 30 myń adam azamattyǵynan aıyryldy, 50 adam ólim jazasyna kesilip, taǵy 450-i azaptaýdan óldi.

Burynǵy prezıdentpen birge onyń úzeńgiles serigi - 89 jastaǵy otstavkadaǵy general Tahsın Shahınkaıa da sottalǵan. Ol buryn eldiń áskerı áýe kúshterine qolbasshylyq etken. Memlekettik tóńkeris qatysýshylary 2012 jyldan bastap jaýapkershilikke tartyldy. Sot prosesi kezinde eks-prezıdent pen serigi de densaýlyǵyna baılanysty kele almady. Sot úkimi aıtylǵan soń bılik partıasy ókilderi sol tóńkeristiń basqa da kózi tiri qatysýshylaryn qatań jaza kútip turǵanyn málimdedi. Al kezinde "isteýge tıis nárseni ǵana istedim" dep málimdegen Evren óz áreketine ókinish bildirmepti.