Búgin búkil álemdi tańdandyrǵan jaǵdaı oryn aldy. Feısbýk áleýmettik jelisi ýaqytsha óz jumysyn doǵardy. Barsha adamdar basqa Twitter, Vkontakte sıaqty áleýmettik jelilerde Feısbýktiń jumysy toqtaǵany týraly álemge jar saldy.

Iá, biz túski asqa ketip qalǵanda Feısbýk óz jumysyn toqtatyp, búkil jurtty abdyratyp tastaǵan eken. Áleýmettik jelige enýge tyrysyp kórdik, biraq ashylmady. Sosyn Twitter-di ashyp qaradym. Asha sala kózim «Feısbýk qulady» degen mazmundaǵy týıtter arqyly Feısbýk jumysyn toqtatqanyn bildim.

Osy ýaqytqa deıin esh jerde Feısbýk jahandyq deńgeıde óship qalmaǵan edi. Taıaýda Túrkıada Twitter, sonymen qatar, basqa da musylman elderinde Youtobe.com sıaqty tanymal iri áleýmettik jeliler men tanymdyq saıttar óz jumysyn doǵarǵan ýaqytta búgingideı dúrligý bolǵan joq.

WorldPay tólem júıesiniń esepteýi boıynsha, álemdik alpaýyt áleýmettik jeli óz jumysyn toqtatqan 25 mınýt ishinde qansha qarjydan qaǵylǵanyn eseptep úlgerdi, kompanıa 376,3 myń AQSH dollary kólemindegi paıdadan qur qalǵan eken.

WorldPay-diń statısıkasyna júginsek, dál qazirgi ýaqytta Apple, Microsoft jáne Google syndy kompanıalar myńdaǵan dollar taýyp jatyr. Aldymen WorldPay-diń qalaı jumys jasap, iri-iri kompanıalardyń tapqan paıdasyn qalaı esepteıtini týraly aıta keteıik. WorldPay ózi zertteıtin árbir kompanıanyń 2013 jyly, ıaǵnı ótken jyly tapqan jalpy qarjysyn eseptep, sosyn ony sekýndtarǵa bólip shyǵady.

Kez-kelgen adam myna silteme arqyly https://www.worldpayzinc.com/tech-wealth/ Apple jáne de basqa iri kompanıalardyń qansha ýaqytta qansha paıda tabatyny týraly bile alady.

2004 jyldan beri qoldanysta kele jatqan Feısbýk búgin ıaǵnı 2014 jyldyń 19-maýsymy kúni jumysyn 25 mınýtqa toqtatty. Osy ýaqyt aralyǵynda Mark Sýkerberg oılap tapqan áleýmettik jeli 376,3 myń dollardan qur qalǵan.

Apple bir mınýtta $70 myń kóleminde aqsha tabady. Oǵan básekeles bolý tek azıalyq Samsung kompanıasynyń qolynan keledi. Odan keıingi oryndy Google alyp tur.

Tanymal kompanıalardyń 1 mınýtta jáne 30 mınýtta qansha paıda tabatyny tómendegi sýrette jaqsy kórsetilgen.