Maýsymnyń 21-22-si kúnderine josparlanǵan Er Jánibektiń 300 jyldyq mereıtoıynyń alǵashqy kúni búgin kópshilik qaýymnyń tańǵy saǵat 08.00-de Shyǵys Qazaqstan oblysy Jarma aýdany Qalbataý kentindegi «Er Jánibek memorıaldy kesenesine»jınalyp, batyr rýhyna arnap oqylǵan quran hatymnan bastaý aldy. Odan keıin 100-den asa tigilgen kıiz úılerge respýblıkanyń ár buryshynan kelgen qadirmendi qonaqtardy ornalastyryp, as-sý berý sharalary atqaryldy. Túske taman respýblıkalyq deńgeıdegi kókpar ulttyq oıyny bastalyp, birneshe oblystyq komandalar bap pen baqtaryn synaýǵa kirisip ketti. Kókpar qyzyǵy kelesi kúni de jalǵasyn tappaq.

Sondaı-aq, Shyǵys Qazaqstan oblysynyń Jarmaý aýdanynda ótip jatqan Er Jánibektiń 300 jyldyq mereıtoıy Qalbataý kentinde «El qorǵany Er Jánibek» atty ǵylymı-tájirıbelik konferensıamen jalǵasty. Jıyn shymyldyǵy «Er Jánibek» atty derekti fılmniń kórsetilýimen ashyldy. Sóz tizginin ustaýshy Semeı qalasynyń ákimi Aıbek Kárimov konferensıaǵa kelgen barsha qonaqtar men tarıhshy, jazýshy-ǵalymdarǵa alǵys aıta kele baıandama kezegin Jarma aýdanynyń ákimi Ánýarbek Muhtarhanulyna berdi. Óz kezeginde Ánýarbek Muhtarhanuly Shyǵys Qazaqstan oblysynyń ákimi Berdibek Saparbaevtyń quttyqtaýyn jetkize otyryp: «Er Jánibektiń 300 jyldyq mereıtoıy barsha qazaqqa ortaq qýanysh. Óıtkeni, batyrdyń ózi alty alashqa ortaq tulǵa ekeni daýsyz», - degen zıaly pikir bildirse, akademık Tursynbek Kákishuly: «Mundaı kólemdi jıyn buryn-sońdy qazaq dalasynda óte qoıǵan joq shyǵar. Batyr rýhyn asqaqtatýǵa sińirgen eńbegi úshin oblys ákiminen bastap barlyq azamattarǵa aıtar alǵysym sheksiz. Tarydaı shashylǵan qazaqty kók týdyń astyna biriktirý úshin mundaı sharanyń mańyzy erekshe. Jánibektiń mereıtoıy barsha qazaq halqyn eldikke bastasyn», - dep, aq tileýli lebizin bildirdi.

Konferensıa barysynda Qazaqstannyń halyq jazýshysy Qabdesh Jumadilov, QR memlekettik syılyǵynyń ıegeri, aqyn Nesipbek Aıtuly, belgili alashtanýshy ǵalym Tursyn Jurtbaı, QHR eńbek sińirgen qaıratkeri, jazýshy Shámis Qumaruly, ádebıettanýshy ǵalym, pofessor Serikqazy Qorabaı, jazýshy-ǵalym Nurdáýlet Aqysh, tarıhshy Janymhan Oshanuly syndy tulǵalar baıandama jasap, Er Jánibektiń erlik isteri men saıası-qoǵamdyq eńbekterine jete mán berdi. Konferensıa sońy Jarma aýdanynyń «Káýsar» ult-aspaptar orkestriniń konsertimen aıaqtaldy. Al, mereıtoıdyń ekinshi bólimi 22 maýsym kúni alaman báıge, qazaq kúresi, áıelder kúresi, qyz qýý, teńge alý syndy t.b. ulttyq oıyndarmen jalǵaspaq.