countrymeters.info saıty Qazaqstan halqynyń sany 18 mıllıonnan asqanyn kórsetti, dep habarlaıdy «Qamshy» portaly. Búgingi kórsetkish boıynsha, Qazaqstan halyq sany 18 mıllıon 22 myń 500 adamdy quraıdy.
Onda, Qazaqstan halqynyń 2015 jyldyń aıaǵyna deıin 17 769 475-ǵa jetkeni, bıylǵy jyldyń ósimi boıynsha, Qazaqstan halqynyń sany 18 044 724 deıin jetýi múmkin ekeni boljanǵan.
Aıta keter bolsaq, bıylǵy jyldyń 17 qyrkúıeginde, Aqtóbe oblysy ákimi Berdibek Saparbaev Aqtóbede ótken «Klasterlik medısına, memlekettik-jeke seriktestik, halyqaralyq baılanystyń damýy» atty halyqaralyq forýmda da bundaı qýanyshty jańalyqty aıtqan bolatyn.
«Táýelsizdik jyldary Qazaqstan memleketi, basshylyǵy medısınany basty nazarda ustap keledi. Birneshe memlekettik baǵdarlama qabyldanyp, tolyǵymen iske asyryldy. «100 mektep, 100 aýrýhana», «Salamatty Qazaqstan», «Densaýlyq» baǵdarlamalary bar. Memlekettik baǵdarlamalardyń nátıjesinde Qazaqstan halqynyń ortasha ómir súrý jasy 72-ge jetti, halyq sany 18 mıllıonnan asty. Qazaqstanda dúnıejúzilik standartqa saı aýrýhanalar men emhanalar salynyp, ǵalymdary, dárigerleri álemniń úzdik emdeý ortalyqtarynda bilim alyp, eńbek jolyn elimizde jalǵastyryp jatyr», - degen edi ákim óz sózinde.
Eske salsaq, 2015 jylǵy 1 qarashadaǵy jaǵdaı boıynsha elimizdegi halyq sany 17 mln. 630,7 myń adamdy qurady. Bul týraly QR Ulttyq ekonomıka mınıstrliginiń Statısıka komıtetinen habarlanǵan bolatyn. Onda, 2015 jylǵy qańtar-qazanda halyq sany jalpy el boıynsha 213 myń adamǵa nemese 1,2 paıyzǵa óskeni, osy kórsetkish boıynsha 2014 jylǵy 1 qarashamen salystyrǵanda halyq sany 253 myń adamǵa nemese 1,46 paıyzǵa artqandyǵy aıtylǵan bolatyn.
Bıylǵy jyly naýryz aıyndaǵy premer-mınıstr Kárim Másimovtiń resmı saıty osy jylǵy aqpannyń 1-i kúngi jaǵdaı boıynsha, Qazaqstan halqynyń sany 17 mıllıon 693 myń 5 adam bolǵanyn habarlaǵan edi. Al, Qazaqstan halqynyń sany jyl basynan naýryz aıynyń birine deıin beri 0,2%-ǵa artyp, 2016 jyldyń 1 naýryzyna 17 mln 713,8 myń adam boldy, dep habarlaǵan bolatyn QR ulttyq ekonomıka mınıstrliginiń statısıka komıteti. Ol aqparatta 2015 jylǵy 1 naýryzben salystyrǵanda halyq sany 255,3 myń adamǵa nemese 1,46% ósti, delingen edi.
Osy kórsetkishterge analız jasaıtyn bolsaq, countrymeters.info kórsetkishteri shyndyqqa jaqyn bolýy ábden múmkin. Qazaqstan statısıka komıtetiniń Negizgi áleýmettik-ekonomıkalyq kórsetkishterdiń sońǵy derekteri boıynsha, Halyq 2016 jylǵy 1 mamyrǵa 17 mıllıon 753 myń 200-di kórsetken. Qazaqstan halqynyń bir jyldyq ósimi 250 myń adamnan kóbirek deńgeıde bolatyn bolsa, biz jyl aıaǵyna deıin anyq 18 mıllıon kórsetkishin kórip qalýymyz múmkin.
Atalǵan saıtta sáıkes ýaqytqa deıingi Jer betiniń halyq sany 7 mıllıard 480 mıllıon 500 myńǵa jýyq ekeni kórsetilgen. Ári, Jer betiniń halyq sany shamamen keler jyldyń naýryz aıynda 7,5 mıllıardqa jetýi múmkin ekeni aıtylǵan. Jobanyń boljaýynsha, Jer betindegi kelesi jarty mıllıardtyq ósim 5-aq jylda baıqalyp, 2022 jyly adam balasy 8 mıllıardqa jetetinin tuspaldanǵan.
Aıta ketsek atalǵan joba halyq sanynyń ósim dınamıkasyn kórsetýdi maqsat etedi jáne álemniń kez kelgen elindegi basqa da demografıalyq, áleýmettik prosesterdi kórsetýge baǵyttalǵan. 2011 jyldyń sońynda jobany qurý kezeńinde, joba qurýshylary aldyna statısıkalyq aqparattyń negizgi kózi bolyp tabylýdy maqsat etpedi. Sondyqtan shynaıy statısıkalyq kóz bolyp tabylmaıdy. Alaıda, joba ıeleri óz algorıtmderin únemi jetildire otyryp, boljamdarynyń shynaıy demografıalyq kóriniske barynsha jaqyn bolǵanyn kózdeıdi. Sondyqtan joba statısıkasy kórsetken nátıje ár eldiń Statısıkalyq qyzmetteriniń jarıalaǵan málimetterimen barynsha qaraılas keledi.
Sondaı-aq, jobanyń kórsetken statısıkasy BUU-nyń Ekonomıkalyq jáne áleýmettik máseleler departamentiniń Halyqtyń bólimi jarıalaǵan málimetterdi de paıdalanady.
