Hromtaý aýdany Bógetsaı aýylynyń turǵyndarymen kezdesýinde Aqtóbe oblysynyń ákimi Berdibek Saparbaev básekelestikke tótep berýdiń joly et, sút, nan jáne taǵy basqa ónimderdiń óndiris kólemin arttyrý ekenin atap ótti.

«Naryqqa baılanysty baǵany joǵarylatpaýdyń bir-aq joly bar. Ol — básekelestikti damytý. Etti kóbirek shyǵarýymyz kerek, sút pen nandy kóp shyǵarý kerek. Aýyl mańynan aǵyp jatqan Or ózenin de tıimdi paıdalanýymyz kerek. Jan-jaǵyna kókónis, daqyldar egý kerek. Ózimizdiń ónimdi kóbeıtý kerek», — dedi oblys basshysy.

Óńirde qant pen shaıdy ǵana óndirý múmkin emestigin aıtqan Berdibek Saparbaev ózge ónimderdi shyǵarýǵa bolatynyn jetkizdi.

«Ókinishke qaraı, sońǵy kezde barlyǵymyz daıyn zatqa júgiremiz. Aýylda turyp nan satyp alǵan, et pen sút, jumyrtqa satyp alǵan durys emes, aýyl turǵyndarynda munyń barlyǵy bolýy kerek qoı. Jeńgelerimiz, kelinderimiz, qyzdarymyz erinshek bolyp bara jatyr. Árıne, jaǵdaı jaqsarǵandyqtan bolar. Degenmen, ózimizdi ózimiz osyndaı ónimdermen qamtamasyz ete bilýimiz kerek», — dedi oblys basshysy.

Onyń aıtýynsha, tabıǵı taza ónim densaýlyqqa da paıdaly.

«Aýyl balalary buryn nege aýyrmady? Jótel degendi bilmeı ósti. Óıtkeni, barlyǵy taza tamaq bolatyn. Jalańaıaq, jalańbas júgirip júretin. Qumnyń ústinde oınaıtyn», — dedi Saparbaev.

Derek kózi: Baq.kz