Nursultan Nazarbaev otandyq aıaq kıimge jarnama jasap berdi dep habarlaıdy ktk.kz arnasynyń tilshisi Erbol Seıilhan
Qazaqstanda taǵy bir jańa mınıstrlik paıda bolýy múmkin. Prezıdent Syrtqy İster jáne saýda mınıstrligin qurý týraly jospary baryn aıtty. Vedomstvo saıasatpen ǵana emes, eksportpen jáne elge ınvestısıa tartýmen aınalysýy tıis. Búgin telekópir kezinde ondaǵan zaýytty iske qosqan memleket basshysy, otandyq aıaqkıimge de jarnama jasap berdi. Osy jerde Nazarbaev ındýstrıalandyrýdyń olqy tusyn synap, kemshilikti túzeýdiń jolyn da kórsetti.
Búdjettiń mıllıardttary esepsiz bólinip jatqan aýqymdy istiń oryndalýyn jyl saıyn prezıdenttiń ózi tekseredi. Sondyqtan ındýstrıalandyrý baǵdarlamasyna basymen jaýapty Investısıalar jáne damý mınıstrligi men oblys ákimderi jantalasyp, Elbasyǵa jaǵyp qalýǵa tyrysady. Al búgin Nursultan Nazarbaev 16 óńirde salynǵan 23 jańa óndiristi tikeleı efırde iske qosty. Bulardyń ishinde, «Almaty-SHý» baǵyty men Quryq portyna aparatyn temirjol jelisi, Atyraýda qaıta jóndelgen munaı óńdeý zaýyty, túrli metal, taǵam, tyńaıtqyshtan bastap qara ýyldyryqqa deıin shyǵaratyn fabrıka da bar. Ásirese, memleket basshysyna Almatyda tigile bastaǵan otandyq aıaqkıimder qatty unady.
Nursultan Nazarbaev, Qazaqstan Respýblıkasynyń prezıdenti:
-Jańadan óndiris ashylady degennen keıin búgingi basqosýǵa otandyq kostúm kıip keldim. Aıaq kıim de senderden satyp aldym. Qazir aıaǵymdy kóterip kórsete almaımyn, biraq sender óndirgen aıaq kıimdi kıip otyrmyn. Halyqty otandyq jeńil ónerkásip tikken kiıimderdi alýǵa shaqyramyn. Ári qaraı osyny damyta berińder, básekege saı bolyp, ıtalıalyqtardan da, fransýzdardan da kem shyǵarmaıtyn bolyńdar.
Búgin sán-saltanatpen ashylǵan kásiporyndar tolyq qýatyna kóship jarty jolda toqtap qalmaýy tıis. Ótkennen sabaq alýǵa keńes bergen prezıdent bul jobalarǵa mınıstr men ákimderdiń basymen jaýap beretinin taǵy da qatal eskertti. Osy jerde Nazarbaev Qazaqstanda kimniń saýdamen, kimniń syrttan aqsha ákelýmen aınalysyp jatqanyn túsinbeı dal boldy.
Nursultan Nazarbaev, Qazaqstan Respýblıkasynyń prezıdenti:
-Úkimet ınvestısıa jáne saýdamen kimniń aınalysyp jatqanyn bilmeıdi. Syrtqy ister mınıstrligi kóptegen elderdegideı Syrtqy ister jáne saýda mınıstrligi bolý kerek shyǵar? Al Indýstrıa mınıstrliginde ındýstrıamen aınalysý qajet. Munymen naqty kim aınalysatynyn anyqtap alýymyz kerek.
Júıesizdiktiń kesirinen sheteldik qaltaly kásipkerler búrokratıadan, negizsiz kabınetke júgirýden sharshap, elderine qaıtyp ketip jatyr eken. Buny estigen memleket basshysy jaýapty sheneýnikterdi birden jumystan qýýdy talap etti.
Nursultan Nazarbaev, Qazaqstan Respýblıkasynyń prezıdenti:
-Sondyqtan da men eskertemin: men byltyr osy másele boıynsha kimdermen sóılestim, solar qajetti jumystardy júrgizýi qajet. Jazbasha túrdegi esepti maǵan tapsyrasyńdar. Jáne de ınvestorlardy ıterip tastaıtyn adamdar jumysta maǵan kerek emes. Men olardy da ıterip, jumystarynan bosatatyn bolamyn.
Eldi munaıǵa táýeldilikten qutqarýy tıis ındýstrıalandyrýǵa 7 jyldyń ishinde 5 trıllıon teńge jumsalyp, myńǵa tarta zaýyt salynǵan. Al bıyl on aıda 10 aıda 180 mıllıard teńgege 60 joba iske qosylypty. Eksportqa ónim shyǵarýdy talap etken Elbasy velosıpedtti qaıta qurastyryp, kóshirmege aınalýdyń qajeti joq dedi.
Nursultan Nazarbaev, Qazaqstan Respýblıkasynyń prezıdenti:
-Sovetskıı Soıýz hotel sozdat Mercedes, sozdal "Volgý". Hotel sozdat Toyota, sozdal "Ladý". I chto polýchılos ız etogo?! Ne nado. Kak by ne zahotelı, Mercedes ne smojem sozdat. "Boıngı", samolety sozdavat ne nado, da ı ne nýjno. Eto estv mıre. To, chto ne nýjno, kýpım, to, chto mojem sozdat ı prodat, nado sozdavat.
Búgin prezıdentke eń maqtaýly degen jobalar kórsetildi. Biraq Investısıalar jáne damý mınıstrliginiń qarqyny qatty. Jetoqsannyń sońyna deıin taǵy 700 mıllıard teńgege 63 zaýytty iske qospaq. Sóıtip bos júrgen 7 myń adamdy jumysqa ornalastyrmaq oıda.
