16 qarasha kúni qurylysshylardyń kóz aldynda opyrylǵan EKSPO-2017 kórmesi aýmaǵyndaǵy nysandy zertteý jumystary aıaqtaldy. Komısıa qorytyndysyna sáıkes, ǵımaratty jobalaý kezinde qatelik ketken. Bul týraly «Astana EKSPO-2017» UK» AQ Qoǵammen baılanys departamentiniń dırektory Sergeı Kýıanov málimdedi, dep habarlaıdy Baq.kz saıty.

Esterińizge sala keteıik, áleýmettik jelide ǵımarattyń qulap qalǵany túsirilgen vıdeo tarap ketken bolatyn.

«Dekoratıvti kópirdiń bir bóligi aıaqtalǵan edi, ol rasynda opyryldy. Nysandy jobalaý kezinde qatelik ketken. Bul ǵımaratty BI Group kompanıasy salyp jatyr. Olar jobalaýshyny shaqyrdy, qurylys bóligin qaıta qalpyna keltiredi», - deıdi Sergeı Kýıanov.

Onyń aıtýynsha, ulttyq kompanıadaǵylar ǵımaratty paıdalanýǵa qabyldap almaǵandyqtan, bul nysandy merdigerler óz qarajatyna qaıta qalpyna keltirýi tıis.