Astana, 7 jeltoqsan, Májilis úıi. Búgin Parlament Májilisiniń Spıkeri Nurlan Nyǵmatýlınniń tóraǵalyǵymen ótken Palatanyń jalpy otyrysynda depýtattar «Qazaqstan Respýblıkasy Táýelsizdiginiń jıyrma bes jyldyǵyna baılanysty raqymshylyq jasaý týraly» zań jobasyn maquldady dep habarlaıdy QR Parlamenti Májilisi Apparatynyń Baspasóz qyzmeti.
Májilis Tóraǵasy Nurlan Nyǵmatýlın:
- Bul zań jobasy tikeleı Elbasymyz Nursultan Ábishuly Nazarbaevtyń bastamasymen alǵashqy ret engizildi. Osy oraıda, Prezıdentimiz qatelik jasaǵan azamattarǵa keshirim jasap, olardyń jańa ómir bastaýyna jol ashyp otyr. Bul táýelsiz elimizdiń shyn máninde demokratıalyq jáne órkenıetti el bolýynyń naqty kórsetkishi,-dep atap ótti.
Zań jobasynda azamattardyń áleýmettik osal sanattary – kámeletke tolmaǵandarǵa, júkti áıelderge, kámeletke tolmaǵan balalary nemese múgedek balalary bar áıelderge, sondaı-aq kámeletke tolmaǵan balalardyń jalǵyz ata-anasy bolyp tabylatyn er adamdarǵa, I, II jáne III toptaǵy múgedekterge, elý jastaǵy jáne ol jastan asqan áıelderge, alpys jastaǵy jáne ol jastan asqan er adamdarǵa, Uly Otan soǵysynyń qatysýshylary men múgedekterine jáne olarǵa teńestirilgen adamdarǵa, áskerı jáne ınternasıonaldyq boryshyn oryndaý kezinde qaza tapqan áskerı qyzmetshilerdiń jesirlerine, sondaı-aq kúıeýleri soǵys múgedekteri jáne olarǵa teńestirilgen adamdar bolyp tabylatyn áıelderge qatysty raqymshylyq jasaý uıǵarylyp otyr.
Barlyq qylmystyq ister men sottar qaramaǵan ister boıynsha, qylmystyq teris qylyqtar men onsha aýyr emes qylmystar boıynsha is júrgizýdi toqtatý kózdelip otyr. Sottalǵan adamdardyń jekelegen sanattary úshin jaza merziminiń ótelmegen bóligin aıyppulmen nemese bas bostandyǵyn shekteýmen aýystyrý nemese ony qysqartý rásimin qoldaný múmkindigi paıda bolady.
Sonymen qatar, zań jobasynda raqymshylyq jasaý aktisi qoldanylmaıtyn adamdardyń aıasy belgilenedi. Bul jynystyq tıispeýshilikke qarsy qylmystar; terorıstik jáne ekstremıstik qylmystar; azaptaýlar jasaǵan adamdar; resıdıvıser; ómir boıyna bas bostandyǵynan aıyrýǵa jazalanǵan, sondaı-aq keshirim jasaý tártibimen ólim jazasy bas bostandyǵynan aıyrýǵa aýystyrylǵan adamdar, buryn raqymshylyq jasalǵan nemese keshirim jasalǵan jáne qaıtadan qasaqana qylmystar jasaǵan adamdar; qylmystyq toptar quramynda qylmystar jasaǵany úshin sottalǵan, sondaı-aq qylmystyq zańda belgilengen birqatar ózge de qylmystar jasaǵan adamdar.
