«Samuryq-Qazyna» qory óz quramyndaǵy «Eır Astana», «Qazaqtelekom», «QazAtomÓnerkásip», «QTJ», «QazMunaıGaz», «Samuryq-Energo», «Qazposhta» kompanıalarynyń aksıalaryn satylymǵa shyǵarmaq. Bul týraly búgin Úkimet otyrysynda qor basshysy Ómirzaq Shókeev málim etti.

Qor basshysynyń aıtýynsha, kompanıanyń negizgi aktıvteri IPO arqyly satylady. Mundaı sheshim Memleket basshysynan qoldaý tapty. IPO-ǵa birinshi bolyp, «Eır Astana», «Qazaqtelekom», «QazAtomÓnerkásip» kompanıalary shyǵady.

«Eır Astana» kompanıasy IPO-ny naryqtyń damýyna qaraı, 2017 jyldyń sońynda nemese 2018 jyldyń basynda ótkizýdi josparlaýda. Nátıjesinde kompanıa qolynda daýys berýshi aksıanyń 25+1 paketi qalady. Aksıanyń 51 paıyzy qazaqstandyq ınvestorlardyń qolynda qalýy tıis degen sheshim shyǵaryldy. «Qazaqtelekom» kompanıasy – ol qazirdiń ózinde 49 paıyzǵa jeke menshikte. Biz kompanıany IPO-ǵa kelesi jyldyń sońynda daıyndaýdy kózdep otyrmyz.

«QazAtomÓnerkásip» kompanıasynyń IPO baǵdarlamasy 2018 jyly ótedi dep mejelenýde jáne onyń 25 paıyz aksıasy satylady. «QazMunaıGaz» kompanıasynyń IPO-sy da 2018 jyldyń basynda ótedi jáne 25 paıyz aksıasy saýdaǵa yshǵady. «Samuryq-Energo» kompanıasynyń IPO-sy 2019 jyly qýattylyq naryǵy tolyq kúshine engen kezde ótedi. Satylym kólemi aksıanyń 25 paıyzy dep qarastyrylýda. Múmkin aksıanyń 51 paıyzy saýdaǵa shyǵarylýy yqtımal. «Qazposhta» IPO-ny 2019 jyly 49 paıyzǵa deıin ótkizýi múmkin. «Qazaqstan temirjoly» kompanıasy jańǵyrtýdan keıin IPO-ny 2020 jyly ótkizýdi josparlaýda. Aksıanyń satylymǵa shyǵatyn kólemi – 25-49 paıyz. Sonymen qatar biz qordyń endi ǵana ósip kele jatqan aktıvteri «Qazaq Eır» men «Taý-ken Samuryq» kompanıalaryn saýdaǵa shyǵaramyz», – dedi ol.

Onyń aıtýynsha, jekeshelendirýge jatatyn qor aktıvteriniń tiziminde 217 nysan bar, onyń iri aktıvter kórsetilgen birinshi bóliginde 44 nysan bar bolsa, ekinshisinde – 173 aktıv bar.

«Birinshi tizimdegi 44 aktıvterge toqtalatyn bolsaq, 11 aktıv boıynsha, memlekettik komısıanyń sheshimi shyǵaryldy», – dedi Ó. Shókeev.

Olardyń qatarynda QTJ, QazMunaıGaz, Samuryq-Energo kompanıalarynyń – «Transtelekom», «EýrazıaEır», «Mańǵystaý REK», «SHQO REK», Aqtóbe JES, TeńgizMunaı syndy aktıvteri bar.

«Bul nysandar ashyq satylym arqyly saýdaǵa túsedi. «Transtelekom», «EýrazıaEır» boıynsha jaqyn arada habarlandyrý bolady. «Qazaqstan temirjoly» kompanıasynyń tórt aktıvi – «Lokomotıv qurastyrý zaýyty» AQ, «Elektrovoz qurastyrý zaýyty» AQ, «Tulpar-Talgo» AQ, «KTZE – Khorgos Gateway» kompanıasy tikeleı «General Electric», «Alstom», «Talgo», Lánúngan porty syndy kompanıalarǵa satylady. Eki nysan 2016 jyldyń sońynda, qalǵan ekeýi 2017 jyldyń birinshi jartyjyldyǵynda satylady dep josparlap otyrmyz. Olardyń satylymynan túsetin jalpy soma – shamamen 400 mlrd. teńge», – dep atap ótti qor basshysy.