Almatyda 7-9 jeltoqsanda Ortalyq Azıadaǵy eń iri ınvestısıalyq is-shara – «Almaty Invest-2016» IV Halyqaralyq ınvestısıalyq forým ótedi. Bul týraly Almaty qalasy ákimdiginiń baspasóz qyzmeti habarlaıdy.
«Almaty Invest-2016» forýmy – bul qazaqstandyq jáne halyqaralyq ınvestorlarǵa ınvestısıalyq múmkindikter usyný jáne olardy talqylaý boıynsha ótetin is-shara. Forým qoǵam, bıznes jáne memleket arasynda ózara is-qımyl jasaýǵa arnalǵan ashyq alań bolyp tabylady. İs-shara jyl saıyn Almaty qalasynyń ákimdigimen ótkiziledi. İs-shara barysynda 300 mlrd. teńgege ınvestısıalyq jobalar boıynsha memorandýmdarǵa qol qoıý josparlanyp otyr.
Forým baǵdarlamasy úsh kúnge eseptelgen. 7 jeltoqsanda Almaty qalasy ákiminiń tóraǵalyq etýimen óńirlik ınvestorlar keńesiniń májilisi ótedi. 8 jeltoqsanda forýmnyń negizgi baǵdarlamasy ótedi, onda Almaty qalasynyń saýda jáne qyzmet kórsetý salasy, tamaq ónerkásibi, iskerlik týrızm, memlekettik-jeke seriktestik jáne ındýstrıaldyq damý sekildi 5 basym baǵyty boıynsha ınvestısıalyq múmkindikteri talqylanatyn bolady. Spıkerler retinde Carrefour, Leroy Merlin, Sanlas Holding, Tokyo Rope, EuroShop, UBS Asset Management, Dúnıejúzilik bank, EFKO jáne basqa da uıymdardy qosa alǵanda, qalaǵa ınvestısıa salǵan nemese ınvestısıalaýdy josparlap otyrǵan iri halyqaralyq uıymdardyń basshylary shaqyryldy.
9 jeltoqsan áreket etip júrgen kásiporyndar, ónerkásiptik aımaqtar men týrısik nysandar boıynsha qyzyǵýshylyq tanytqan ınvestorlar úshin ınvestısıalyq týrlar úlgisinde ótedi. Budan basqa, KASE qor bırjasy jumysynyń tetikteri boıynsha semınar ótkizý, sondaı-aq «Almaty StartUp City» forýmyn ótkizý josparlanǵan, onyń sheńberinde «Almaty StartUp City-2017» baǵdarlamasynyń tanystyrylymy kórsetiledi, almatylyq startaperler úshin sheber-klasstar men vorkshoptar ótedi.
