Eki kúnge jalǵasatyn sharada óńirdegi jeńil ónerkásip, mashına jasaý, farmasevtıka, tamaq ónerkásibi, qurylys zattary salalarynyń 70-ten astam kásiporyndarynyń otandyq ónimderi qoıyldy. Bul týraly «Qamshy» portaly OQO ákiminiń baspasóz qyzmetine silteme jasap habarlaıdy.
Otandyq taýar óndirýshiler kórmesine oblys ákimi J.Túımebaev jáne «Týǵan jerdi túletý – perzenttik paryz!» atty sharasyna qatysýshylar - QR Parlamenti depýtattary, ortalyq organdar men ulttyq kompanıalar, mádenıet qaıratkerleri jáne zıaly qaýym ókilderi qatysty.
Ashylý saltanatynda sóz alǵan oblys ákimi Janseıit Túımebaev barsha qatysýshylardy Egemendigimizdiń 25 jyldyq merekesimen quttyqtap, shırek ǵasyrda óńirdiń jetken jetistikterin baıan etti.
«Jalpy, álemdik damýdyń kúrdeli kezeńderine qaramastan, Elbasymyz Nursultan Ábishuly Nazarbaevtyń kóregendikpen júrgizip jatqan dana saıasaty arqasynda, tarıhy qysqa merzimde elimiz áleýmettik-ekonomıkalyq jaǵynan qarqyndy damyp, álemniń básekege qabiletti elý eldiń qataryna endi. Onyń ishinde, Ońtústik Qazaqstan oblysynyń jetistikteri de orasan. Máselen, 25 jyl ishinde jalpy óńirlik ónim 1,5 mlrd.teńgeden 2,5 trln. teńgege deıin ósse, ondaǵy ónerkásiptiń úlesi 15 paıyzdan 28 paıyzǵa deıin artty. Osy qarqyn aǵymdaǵy jyly da saqtalyp, 10 aıda ónerkásip kásiporyndarymen 643,1 mlrd. teńgeniń ónimi óndirildi»,- dedi Janseıit Qanseıituly.
Bıyl Ońtústik Qazaqstan oblysy ónerkásip ónimderin óndirýde ósý qarqyny boıynsha respýblıkada 3-shi oryndy ıelengen. Sondaı-aq, oblysta toqyma, munaı óńdeý, mashına jasaý, farmasevtıka, medısınalyq qurylǵylar jasap shyǵarý, qurylys materıaldary jáne basqa da salarda jańa ónim túrlerin óndirý qolǵa alynǵan.
Búgingi kórmeniń mańyzy erekshe. Munda oblys taýar óndirýshileriniń jetistikteri pash etilip, tutynýshylar men óndirýshiler arasynda tyǵyz baılanys ornatýǵa múmkindik týmaq.
Kórmede álemdik standarttarǵa saı keletin kilem ónimderi, shulyq jáne úıge arnalǵan toqyma buıymdary, erler kostúmderi, transformatorlar, sý sorǵylary, dárilik zattar men medısınalyq maqsattaǵy buıymdar, medısınalyq qurylǵylar, qurylys zattary, jıhaz, azyq-túlik ónimderi syndy oblystyń taýar óndirýshileri óz ónimderin jurt nazaryna usynýda.
