Qazaq elindegi saıası matrısa bıliktegi keıbir tulǵalardyń is-áreketinen ǵana ózgeriske ushyraıtynyn kózi qaraqty aǵaıyn jaqsy biledi. Onyń ózi kóldiń betinde sheńber-sheńber iz qaldyrǵandaı ǵana álsiz deńgeıde. Bizde máselen, ashyq pikirtalas, ártúrli partıalar ıa bılik oponentteriniń "ótkir" málimdemeleri saıası axýalǵa túk áser etpeıdi. Saıasattyń baǵytyn buratyn Elbasymyzdan basqa joǵarǵy jaqta tulǵa deıtin kóp kisimiz de joq. Al, sol kóldiń betin jaı dirildetip qana qoımaı, kerek kezde tolqyta da alatyn, qajet kezde álgi kólge asaý-asaý ózenderdi buryp ákep, aıdynnyń sýyn jańartyp turatyn az tulǵalarymyzdyń biri hám biregeıi kim dese, kez kelgen qazaq ol - Imekeń der edi. Jáne bul ádil baǵa. Halyq arzan pıar, ustanymsyz is-áreket, nemquraıdy qımyl-qozǵalystyń barlyǵyn sol zamatta-aq sezip-bilip otyrady. Halyqty aldaý qanshalyqty qıyn bolsa, onyń maxabaty men senimine ıe bolý sonshalyqty kúrdeli dúnıe. Kóz aldynda tek ulttyń múddesi, urpaqtyń bolashaǵy turǵan adamnyń júreginde ǵana asyl oı, batyl sheshim paıda bolatyny aqıqat. Sebebi, nátıje - nıet pen áreketke baılanysty.
Keı adamda túısikten (ınstınkt) bólek pasıonarlyq talshyq bolady. Bul Táńirdiń syıy hám synaǵy. Pasıonarlyq áýelide túısiktiń sózin tyńdamaı, óz ıesin jarǵa jyǵatyndaı da kórinip ketýi bek múmkin. Bul ásirese, saıasatta júrgen tulǵa úshin asa qaýipti-qaterli. Alaıda, tulǵanyń pasıonarlyǵy - tarıx pen taǵdyrdyń mısıasy úshin berilgendikten, túısiktiń ózi Kókte jazylǵan pesheneni egjeı-tegjeıli bilmeı jatady. Biz osy bir pasıonarlyq energıany Imekeńniń boıynan kórgendeı bolamyz. Memleket qaıratkeri retindegi ǵumyrnamasyna kóz júgirtseńiz, kóz jetkizer edińiz. Elbasynyń senimdi sardary ári serigi ol eshqashan attan túsken emes. Sebebi, Prezıdent adam tanıtyn kisi. Oǵan Táýelsiz memlekettiń irgetasyn qalasatyn ishki energıasy mol qaıratkerler kerek bolatyn. Tańdaý Tasmaǵambetov sekildi at tóbelindeı shoǵyrǵa tústi jáne olar qoldan kelgenshe basshysyna kómektese bildi, elge qyzmet etti. Keıde anaý-mynaý dep synap-minep jatamyz. Durys, qatelikter bar. Qatelikter bar bolsa, demek jumys bar. Bul ómir, jáne siz ben bizdiń ómir. Siz ben bizdiń dáýir. Biz osy ózgeristerdiń kýásimiz, jańa ýaqytyń tynysymen ǵumyr keship jatqan adamdarmyz. Sol sebepten, kóp nársege salmaqty oı, saralanǵan pikirmen qaraǵanymyz abzal. Keıde men ózime mynandaı suraq qoıamyn: dál qazir meni bir orynǵa qonjıtyp otyrǵyzyp qoısa, men qanshalyqty deńgeıde óz mindetimdi sapaly oryndaı alamyn? Oǵan meniń ómirlik hám eńbek tájirıbem jete me? Olaı oılaıtynymyz: xalyqtyń taǵdyryna jaýapty bolýǵa qaýqarymyzdy salmaqtaǵanymyz. Halyqtyń taǵdyryna jaýapty bolý - qoı baǵý emes. 
Bizdiń Táýelsiz zamanymyzdaǵy eldiń taǵdyryna eleýli áser etkenderdiń biri osy - Imekeń. Áli de qolynan kelgen sharýany istep júr. Sol úshin raxmet aıtalyq. Imanǵalı Tasmaǵambetov - Alashtyń, Táýelsizdiktiń ónimi. Ol bizdiń Qazaqtyń ishinen túlep ushqan suńqar. 60 jyldyq mereıtoıy qutty bolsyn! Jaqsy jas, Imekeń zor abyroımen jetken tamasha beles. Áli de Imekeńe Táńir Otanymyzdyń, Ultymyzdyń ósip-órkendeýine eńbek etýge zor densaýlyq, qajymas qaırat-qýat, uzaq ǵumyr násip etsin dep tiledik!

Aqberen Elgezek