Almatylyq 22 jastaǵy jigit tún ýaqytynda kólikterdiń memlekettik nómirlerin sheship alyp, onyń ornyna mazmundy jazba qaldyryp ketip otyrǵan. Bul týraly qalalyq İİD baspasóz qyzmetine súıene otyryp Stan.kz habarlaıdy.
“Onyń qaldyrǵan jazbasynyń biri A-4 formatyndaǵy qaǵazdan tabylǵan. Onda ol kólik ıesiniń memlekettik nómirdi qaıtarý úshin jasaıtyn áreketin anyqtap jazǵan. Sondaı-aq, ol bul áreketti ıgilikti is retinde jasaıtynyn da aıtqan. Biraq, jedel izdestirý sharasy barysynda belgili bolǵandaı, qylmystyq jolmen kelgen aqshany jumyssyz er adam jeke maqsatta jumsaǵan. Tórt azamat qylmyskermen kelisip, onyń talaptaryn múltiksiz oryndaǵan. Al qalǵan adamdar bolsa bul týraly tek polısıaǵa habar berý kerek dep, durys joldy tańdaı alǵan. Osy rette azamattarǵa sizder tek kelisim jasaý arqyly qylmyskerdiń qolyn uzartasyz jáne olardyń basqa da qylmystar jasaýyna jol ashyp beresiz”, – deıdi Bostandyq aýdandyq polısıa basqarmasynyń basshysy Berik Ábilbekov.
Onyń talaptary mynadaı:
“Óz avtokóligińizdiń nómirin qaıtarý úshin, sizge kelesi talaptardy oryndaýǵa týra keledi:
1. Kıvı-ámıanǵa 5000 teńge jiberý: Nómiri: +7 747 343 22 10
2. Quqyq qorǵaý organdaryna habarlaspaý!
3. Aqshany jibergen kezde uıaly telefonyńyz ben nómir belgisiniń úsh nómirin jazyp jiberý. Mysaly: 8 777 914 56 76 214
4. Aqsha 16.11.2016 kúni saǵat 22:00-den kesh jiberilmeýi tıis.
Aqshany siz kez-kelgen termınaldan jibere alasyz. Joǵarydaǵy talaptardy oryndaǵannan keıin, sizge kóligińizdiń nómiri jasyrýly turǵan orynnyń tolyq meken-jaıy jiberiledi.
Talaptardyń birin buzǵan jaǵdaıda, siz avtoson arqyly kóp ýaqyt pen aqsha jumsap, qalpyna keltirýge májbúr bolasyz.
Óz kezegimizge sizdiń nómirińizdiń qaıtarylatynyna 100 paıyz kepildik beremiz. Jáne ol urlanǵan orynǵa jaqyn mańǵa jasyrylady. Biz de adambyz, sondyqtan osyndaı jolmen aqsha tabýǵa túsinistikpen qaraýyńyzdy suraımyz. Bul biz úshin qaıyrymdy is jasaýdyń birden-bir joly”, – dep jazylǵan.
Qazirgi tańda kúdikti ýaqytsha tergeý ızolátorynda otyr. Jaqyn arada sotqa deıingi tekserý jumystary bastalmaq. Sonymen qatar, krımınaldy polısıa kúdiktiniń basqa da qylmystarǵa qanshalyqty qatysy bar ekendigin zerttep jatyr. Eger qylmyskerdiń áreketinen zardap shekken azamattar bar bolsa, myna nómirlerge habarlasyp shaǵym bildire alady: 254-47-00 jáne 254-47-01.
