Astana soty Seıitqazy jáne Áset Mataevqa qatysty Astanadaǵy Esil aýdandyq №2 sotynyń úkimine baılanysty apelásıalyq shaǵymdy qarady, dep habarlaıdy QazAqparat.
Astana qalasy sotynyń apelásıalyq alqasynyń sýdıasy Alma Esimova Mataevtarǵa qatysty alǵashqy sot úkimin ózgerissiz qaldyrdy. Degenmen ómir boıyna memlekettik jáne komersıalyq uıymdardaǵy uıymdastyrýmen jáne materıaldyq jaýapkershilikpen baılanysty basshylyq qyzmetterdi atqarýǵa tyıym salý jazasy ózgerdi.
«Apelásıalyq sot alqasy Seıitqazy jáne Áset Mataevqa qatysty 3 qazanda Astanadaǵy Esil aýdandyq №2 sotynyń sheshimin ózgertýdi qaýly etti. Ómir boıyna memlekettik jáne komersıalyq uıymdardaǵy uıymdastyrýmen jáne materıaldyq jaýapkershilikpen baılanysty basshylyq qyzmetterdi atqarýǵa tyıym salý jazasynyń ornyna, Seıitqazy jáne Áset Mataevqa memlekettik jáne komersıalyq uıymdardaǵy uıymdastyrýmen jáne materıaldyq jaýapkershilikpen baılanysty basshylyq qyzmetterdi atqarýǵa 10 jylǵa deıin tyıym salý jazasy taǵaıyndalsyn. Úkimniń qalǵan bóligi ózgerissiz qalsyn, prokýrordyń apelásıalyq kelispeýshiligi qanaǵattandyrylsyn», - dedi A. Esimova.
Atalmysh úkim 9 jeltoqsanda kúshine enedi.
Aıta keteıik, 3 qazanda Astanadaǵy Esil aýdandyq №2 sotynyń sheshimimen, memleket búdjetinen iri kólemde aqsha jymqyrdy jáne 300 mln teńge salyqty tóleýden jaltardy dep aıyptalǵan
Seıitqazy Mataev 6 jylǵa bas bostandyǵynan aıyrylǵan bolatyn. Al onyń balasy Áset Mataev 5 jylǵa bas bostandyǵynan aıyryldy. Seıitqazy Mataev pen onyń balasy, «KazTAG» HAA bas dırektory Áset Mataev ózara sybaılasa otyryp, 300 mıllıon teńge jymqyrdy dep aıyptalǵan bolatyn. Buǵan qosa, tergeý sharalary Seıitqazy Mataevtyń 327 mln teńge kólemindegi salyqtan jaltaryp júrgenin anyqtaǵan bolatyn. Seıitqazy Mataev QR QK 177-babynyń 4-bóliminiń B tarmaǵy boıynsha jáne QR QK 245-babynyń 3-bóliminiń, 190-baby, 4- bóliminiń 2-tarmaǵy boıynsha kináli dep tanyldy. Onyń dúnıe-múlki tárkilenip, 6 jylǵa bas bostandyǵynan aıyrý týraly jaza taǵaıyndaldy. Áset Mataev ta QR QK 194-baby 4-bólimi, 190-baptyń 4-tarmaǵynda kórsetilgen qylmystar boıynsha kináli dep tanyldy. Atalǵan baptar negizinde «KazTAG» HAA burynǵy basshysynyń dúnıe-múlki tárkilene otyryp, 5 jylǵa bas bostandyǵynan aıyryldy.
