Aqtóbe oblysy, Alǵa aýdanynyń turǵyny A. Kaýkanova kúıeýinen qorǵanyp, oǵan pyshaq suǵyp alǵan. Jábirlenýshi birer mınýt ishinde kóz jumdy.

Úı ishindegi daý-janjaldyń sońy ólimmen aıaqtalyp, oqıǵa ornynda qamaýǵa alynǵan 28 jastaǵy kelinshek qylmystyq jaýapqa tartyldy. Búgin bir balanyń anasy sot zalynan bosap shyqty, dep habarlaıdy stan.kz

Búgin Aqtóbe oblystyq qylmystyq ister jónindegi mamandandyrylǵan aýdanaralyq sotynda 28 jastaǵy kelinshektiń isine qatysty sot úkimi shyqty. A.Kaýkanova ishimdik iship, keıin ózin uryp-soqqan kúıeýinen qorǵanǵan. As úıde janjaldasyp, keıin oqtaýmen urǵan kúıeýi onyń denesin zaqymdap, judyryqtaǵan. Óz ómiri men densaýlyǵyn qorǵap qalýdy oılaǵan A.Kaýkanova pyshaq ala júgirgen kúıeýiniń qolyn qaıyryp, jaǵalasqan. Qoly qaıyrylǵan kúıeýinen ál ketip, sol arada pyshaq júrek tusyna baryp qadalady. Jábirlenýshi oqıǵa ornynda kóz jumdy.

«Sot azamatsha K-niń bul áreketin áıel adamnyń qajetti qorǵaný is-áreketi dep baǵalap, qylmys quramynyń bolmaýyna baılanysty aqtady. Azamatsha K. sot zalynda qamaýdan bosatyldy. Qylmystyq isti qaraý nátıjesinde oblystyq İİD bastyǵy men oblystyq prokýratýraǵa sotqa deıingi tergeý óndirisin birjaqty júrgizgeni jáne qylmystyq isti jan-jaqty, obektıvti tergemegenderi úshin jeke qaýly shyǵaryldy», – dedi sýdıa Ahmedjan Moldaǵalıev.

Aıta keteıik, 28 jastaǵy A.Kaýkanova Qylmystyq kodekstiń «Kisi ólimi» jáne «Qorǵaný maqsatynda adam óltirý» baby boıynsha sot aldynda jaýap berdi. Ol 8 aı boıy túrmede otyrdy. Al, ony úıinde 3 jastaǵy balasy kútip otyr. Búgin sotqa qatysqan týma-týystary A.Kaýkanovanyń bostandyqqa shyqqanyn kórip, qýanyshtan jylap jiberdi.