Reseılik árbir ekinshi azamat Qazaqstandy post-keńestik elder arasyndaǵy eń damyǵany dep esepteıdi, dep habarlaıdy inform.kz

Kórshiles el halqynyń 52 paıyzy ózine jaqyn ári qarym-qatynasy nyǵaıǵan el dep Qazaqstandy ataıdy. Onyń ústine Reseı prezıdentiniń Nursultan Nazarbaevpen dostyǵy da zor mańyzǵa ıe. Búkilreseılik áleýmettik pikir ortalyǵy zertteýiniń nátıjesi osyndaı.

Máskeý memlekettik ýnıversıtetinde ótken ǵylymı-zertteý konferensıasynda osy oı-pikirler talqyǵa tústi. Jıyndy Qazaqstannyń Reseıdegi elshiligi uıymdastyrdy. Qoǵam qaıratkerleri Qazaq eliniń jetistikterin tarazylap, tarıhshylar tamyry tereń, dińgegi berik memleket ekenin aıtty. Shırek ǵasyr shejiresin saralaǵan ǵalymdar, Qazaqstannyń saıası turǵyda qalyptasyp, ekonomıkalyq turaqtylyqqa qol jetkizgenin tilge tıek etti. Ártúrli ulystardyń, túrli din ókilderiniń bir shańaryq astynda tatý-tátti ómir súrýi álemdik arenada kóp kezdese bermeıtin mysal. Jıynǵa qatysýshylar memleketaralyq qarym-qatynasty nyǵaıtýda Qazaqstannyń septigi mol ekenin erekshe atap ótti.

«Nursultan Nazarbaev shırek ǵasyr boıy eldi basqaryp júrip, Reseıdiń naǵyz jaqyn dosy ekenin kórsetti. Ol kisi saıasatta sabyrly, strategıalyq kózqarasy zor tulǵa. Qazaqstan ekonomıkalyq turǵyda keremet qadam jasady. Buryńǵy keńes elderiniń ishinde kóptegen memleketter sekildi 90-jyldardaǵy qıyn-qystaý kezeńdi bastan ótkerdi. Degenmen, óz qatarlastarynan oq boıy ozyp ketti», deıdi Búkilreseılik áleýmettik pikirlerdi zertteý ınstıtýtynyń bas dırektory Valerıı Fedorov.

«25 jyldyń ishinde bul memleket kóptegen qıyndyqtardan ótti. Damýdyń durys jolyn tańdap, halyqtyń turmys-tirshiligin jaqsartty. Bul oqıǵalar Qazaqstandy senimdi seriktes retinde kórsetedi. Qazaqstan men Reseı qarym-qatynasy odan ári nyǵaıa tússe odan eki memlekette utylmasy anyq», - degen pikirin bildirdi MMÝ Azıa jáne Afrıka elderi ınstıtýtynyń prezıdenti Mıhaıl Meıer.