Brent munaıynyń baǵasy bir jarym jyl ishinde alǵash 57$ asty 2016 jylǵy 12 jeltoqsan Munaı eksporttaýshy elder uıymy (OPEK) men kartelge kirmeıtin memleketter arasynda munaı óndirisin qysqartý týraly kelisimge qol jetkizilgennen keıin,  Brent  markaly munaıynyń fúcherster quny 2015 jyldyń 21 shildesinen beri alǵash ret 57 dollardan asty. Bul týraly QazAqparat habarlaıdy.

Muny  Londondaǵy ICE Qurlyqaralyq bırjasynyń saýda-sattyq málimetterinen kórýge bolady. Senbi, 10 jeltoqsan kúni Venada OPEK-ke múshe emes elder mınıstrleriniń kartelge enbeıtin memleketter ókilderimen kezdesýi aıaqtaldy. Otyrys alty saǵatqa jalǵasyp, nátıjesinde munaı óndirisin shekteý týraly kelisimge qol qoıyldy. Reseı energetıka mınıstri Aleksandr Novaktyń habarlaýynsha, kelisimge OPEK-ke kirmeıtin 11 memleket qosyldy. Olar alǵashqy jartyjyldyqta munaı óndirisin shamamen táýligine 560 myń barelge deıin azaıtatyn bolady. Aıta keteıik, 30 qarasha kúni OPEK quramyndaǵy memleketter munaı óndirisin qysqartý týraly kelisken bolatyn: 2017 jyldyń qańtar aıynan bastap ol táýligine 1,2 mıllıon barelge deıin qysqarady. Sol kúni Novak Reseıdiń otyn óndirisin táýligine 300 myń barelge deıin azaıtýǵa daıyn ekenin habarlady. 

Aıta ketetin bolsaq, osydan úsh jyldaı ýaqyt buryn munaı baǵasy qazirgiden eki esege kóp edi. Atap aıtqanda, 2014 jyly 17 aqpan kúni Brent markaly munaı barreline 109,40 dollar kóleminde baǵalandy. Al WTI markaly munaı barreline 100 dollarǵa jetip, ekeýiniń aıyrmasy 8,54 dollardy kórsetken bolatyn. Munaı baǵasy otyz dollarǵa deıin quldyrap ketkendikten Qazaqstan valútasy eki esege qunsyzdanyp ketken edi. Munaı baǵasy kóterilýin jalǵastyratyn bolsa, valútamyz teńge nyǵaıýy múmkin.