Qazaqstanda memlekettik menshikti ońtaılandyrý 2 kezeńmen júrgiziledi dep habarlaıdy inform.kz
«Búgingi tańda memlekettik menshikte 7 myńǵa jýyq uıym jumys isteıdi, olar - memlekettik kásiporyndar, aksıonerlik qoǵamdar, jaýapkershiligi shekteýli seriktestikter. Túgendeý jónindegi tapsyrmanyń aıasynda ákimderdiń orynbasarlaryn shaqyra otyryp jáne «Atameken» Ulttyq kásipkerler palatasynyń qatysýymen 16 oblys jáne 177 aýdan tyńdaldy. 6 751 uıymnyń ishinen ár nysan qaraldy. Sondaı-aq 376 respýblıkalyq menshik uıymy boıynsha 22 mınıstrlik pen vedomstvo baıandady», - dedi ol.
Mınıstrdiń atap ótýinshe, túgendeý nátıjeleri boıynsha memlekettik menshikti ońtaılandyrý 2 kezeńmen júrgiziledi. Aldymenen memlekettik menshik uıymdarynyń sany 1 myńnan asa uıymǵa nemese 16 paıyzǵa qysqarady. Ekinshi kezeńde taǵy 4 600-ge jýyq uıymǵa nemese bastapqy sanynan 65 paıyzǵa azaıtý usynylady.
«Básekelestik ortaǵa berýden basqa ońtaılandyrýdyń quraly retinde uıymdardy qaıta qurý jáne jabý qolǵa alynady. Birinshi kezeńde uıymdar sany 1 136 kásiporynǵa qysqarady. Olardan: 408 uıym kestege engizilgen; 105 uıymdy kestege engizýdi usynamyz; 380 uıym qaıta qurý jolymen qysqarady; 243 uıymdy taratý (joıý) usynylady. Sonymen, birinshi kezeńnen keıin memlekettik menshikte 6 myńnan az kásiporyn qalady.Qalǵan uıymdardyń negizgi bóligin balabaqshalar, kolejder, aýrýhanalar quraıdy. Olar básekelestik ortaǵa ekinshi kezeńde usynylady. Qazir ákimdiktermen ilki joba retinde 94 uıymdy keıinnen satyp alý quqyǵynsyz senimgerlik basqarýǵa berý kelisildi», - dedi Sultanov.
