Qyrǵyzstan konstıtýsıasyna ózgertýler engizý jóninde búgin ótip jatqan referendýmge buǵan deıin ózge saıasatkerlermen birge oǵan qarsylyq bildirgen qyrǵyz opozısıasy lıderleriniń biri Omýrbek Tekebaev qatysty. Bishkektegi 1220-saılaý ýchaskesinde daýys bergen Tekebaevtyń aıtýynsha, ol daýys berý prosesinde quqyq buzýshylyq baıqamaǵan. Azattyqtyń Qazaq qyzmetine ol búgingi referendýmde «óz ustanymyn» bildirip daýys bergenin málimdedi. Onyń pikirinshe, konstıtýsıaǵa ózgerister engizýge eshqandaı qajettilik bolmaǵan dep habarlaıdy azattyq.org

- Burynǵy prezıdent Qurmanbek Bakıev bıligi ketkennen keıin qabyldanǵan konstıtýsıada onyń 2020 jylǵa deıin ózgertilmeıtini aıtylǵan edi. Al myna referendým konstıtýsıany kez-kelgen ýaqytta ózgerte berýge bolady deıtin eski túsinikke qaıta oralǵanymyzdy bildiredi, - dep málimdedi Tekebaev.

Konstıtýsıaǵa ózgertýler engizý týraly bastamany Jogorký keńeshtegi alty fraksıa – Qyrǵyzstan sosıal-demokratıalyq partıasy, «Respýblıka – Ata Jurt», «Qyrǵyzstan», «Onýgýý - Progres» jáne «Bır bol» kótergen. Atalǵan partıa ókilderi konstıtýsıalyq reformanyń basty maqsaty – úkimet quzyretin keńeıtip, sot júıesi reformasyn jedeldetý dep málimdegen.

Negizgi zańǵa ózgertýler engizýge qarsy shyqqan burynǵy ýaqytsha úkimet músheleri arasynda Omýrbek Tekebaev ta bar. Ol 2010 jyly sáýir revolúsıasy nátıjesinde Qurmanbek Bakıev bılikten ketirilgennen keıin elde júrgizilgen saıası reformalardyń, solardyń arasynda konstıtýsıaǵa engizilgen ózgertýler avtorlarynyń biri bolǵan edi.