Qazaqstannyń Mońǵolıadaǵy Tótenshe jáne Ókiletti Elshisiniń bastamasymen Qazaqstan Respýblıkasy Táýelsizdiginiń 25 jyldyǵyna oraı «Mońǵolıa qazaqtary» atty kólemdi kitap jaryqqa shyqty, dep habarlaıdy baq.kz
Jınaqqa Mońǵolıa elinde dúnıege kelip, eki elge de birdeı eńbek sińirgen jáne áli de qyzmet etip júrgen azamattar jaıly ensıklopedıalyq anyqtamalyq túrinde málmetter engizilgen.
«Bul eńbek Mońǵolıa qazaqtarynyń osy eldiń saıası-ekonomıkalyq, áleýmettik-mádenı damýna qosqan úlesiniń tarıhı orny men róliniń, zıaly qaýymynyń óz ortasyndaǵy ósý joly men bet bedeliniń aıǵaǵy. Atajurt – Qazaqstan Respýblıkasynyń búgingi jasampaz órkendeýine qosyp otyrǵan materıaldyq ári rýhanı úlesteriniń kýási bolmaq» - delingen kitaptyń alǵysózinde.
Sonymen qatar, bul jınaqqa qazirgi Mońǵolıa qazaqtary arasynda bolashaǵynan úmit kúttiredi degen senimge ıe talantty jastardyń da bir shoǵyry qamtylǵan eken.
Árıne, árkim óziniń qal-qaderinshe eńbek etip, óz shamasynsha qazaq ultynyń damýyna qyzmet atqaryp keledi. Osy bir jınaqqa bir elde turatyn barlyq qazaqty sıdyramyn deý ábestik ekenin aıtqan qurastyrýshylar bul eńbektiń Táýelsizdiktiń 25 jyldyǵyna tartqan tartý ekenin aıtady.
Búgin basylymdy Mońǵolıa astanasy Ulanbatyr qalasyndaǵy qazaq zıalylaryna tanystyrǵan joba jetekshisi, kitaptyń redaktory, QR Mońǵolıadaǵy Tótenshe jáne Ókiletti Elshisi Qalybek Qobylandın Qazaqstan Respýblıkasynyń Táýelsizdik kúni qarsańynda qazaq zıalylaryn qabyldap, arnaıy syı-sıapat jasady.
