Aqıyq aqyn Tańjaryq Joldyuly men dáýlesker kúıshi Áshim Dóńshiulynyń aty Kúnes qalashyǵy ortalyǵyndaǵy ortalyq kóshelerge beriletin boldy. Bul týraly «Qamshy» portaly habarlaıdy. Atalǵan ákimshilik oryn Shyńjańdaǵy İle aımaǵynda ornalasqan álemdegi qazaqtar eń kóp qonystanǵan aýdan Kúnes aýdanynyń ortalyǵy bolyp tabylady.
Kúnes aýdanynyń ákimshiligi 9-jeltoqsanda arnaýly qaýly qabyldap, ótken ǵasyrda ádebıet pen mádenıetke eńbek sińirgen, artyna taýdaı mura qaldyrǵan, osy óńirdiń perzentteriniń esimin ortalyqtaǵy han kóshelerge qoıdy.
Búgin, 13 jeltoqsan Shyńjań avtonomıasyna taralatyn qazaq tildi telearnalar men radıolar bul týraly arnaýly habarlar jasap taratqan. Sondaı-aq, İle oblystyq qazaq radıosy 14-jeltoqsan kúni tańǵy efırden qaıtalaı habarlar taratatyn bolady.
Oqyrmannyń esine sala ketetin bolsaq, Qazaq ádebıetiniń kórnekti ókili, Alashordanyń arǵy bettegi jaryq juldyzy Tańjaryq Joldyuly, ataqty kúıshi Áshim Dóńshiuly osy Kúnes aýdanynda týǵan. Olardyń aty týǵan aýylynda ǵana emes Jetisý óńirinde tanymal boldy. İleni en jaılaǵan qazaqty biri jyrymen terbese biri kúıimen sýsyndatty. Áshim Dóńshiuly (1896-1962) óz janynan júzge tarta kúıler shyǵarǵan.
Tańjaryq Joldyuly (1903-1947) – túrme ádebıetin qalyptastyrýymen aty tanymal. Birneshe jylyn Qazaqstanda ótkizgen Tańjaryq – Qytaıdaǵy qazaq ádebıetiniń negizin qalaýshy. Ol – Shyńjań óńirinde alǵashqy qazaq gazetin shyǵaryp, teatr ashqan, ustazdar jasaqtap, mektep saldyrǵan aǵartýshy. Eń bastysy, Tańjaryq – Álıhan Bókeıhanov bastaǵan «Alashordanyń» Qytaı jerindegi ókili boldy. Ol óz ómiriniń on jylǵa jýyq ýaqytyn túrmede ótkizdi. Qaısar qalamger Tańjaryq shyǵarmalarynyń 80-90 paıyzy túrmede jazylǵan.
Atalǵan Kúnes aýdanynda qalyń jurtqa tanymal jazýshy Jumádil Maman, «Kók týdyń jelbiregeni» ánin ómirge ákelgen Ermurat Zeıiphan sıaqty tulǵalar týǵan.
Aıta ketsek, Tańjaryq pen Áshim atyna Astana qalasynda da kóshe ataýlary berilgen.
