Túrkıa Premer-Mınıstri Redjep Erdoǵan AQSH Prezıdenti Barak Obamamen telefon arqyly jeke sóılesýden tyıylǵanyn málim etti, dep habarlady QazAqprat sheteldik BAQ-qa silteme jasap.

«Ótken joly men Obamaǵa tikeleı qońyraý shaldym. Endigi ýaqytta bizdiń syrtqy ister mınıstrlerimiz ózara sóılesýde. Óıtkeni, men Sırıa boıynsha kútken nátıjelerge qol jetkize almadym», - degen óz málimdemesinde Túrkıa premeri R.Erdoǵan. Ol: «Men ádildikti kútken edim jáne ádildik jaqtastary sanalatyndardan mundaıdyń  shyǵatynyn elestete de almaımyn»,- dep keıigen.

Aıta ketetin bolsaq, Vashıngton men Ankara arasyndaǵy dúrdarazdyq AQSH-tyń Sırıaǵa qatysty áskerı operasıa júrgizbeýinen keıin týyndaǵan edi. Al áskerı operasıanyń oryn alýyna R.Erdoǵan úmit artqan bolatyn. Budan bólek Túrkıa Premer-Mınıstri men Vashıngton arasynda Gaza sektoryndaǵy  oqıǵalarǵa qatysty qarama-qaıshylyqtar bar. Eske salsaq, 2 aptanyń ishinde Izraıl áskeri 580-nen astam palestındikti óltirgen. Osyǵan oraı R.Erdoǵan bul oqıǵalardy «memlekettik lańkestik», «genosıd» dep baǵalap, AQSH-tyń Izraılge qoldaý kórsetýin synaǵan edi.

“Qamshy-aqparat”