Aqtóbede bezbúırek ana jańa týǵan sábıin 8800 dollarǵa satpaq boldy, dep habarlady QazAqparat oblystyq ishki ister departamentiniń baspasóz qyzmetine silteme jasap.

«Aǵymdaǵy jylǵy 29 shildede Aqtóbe oblystyq İİD qyzmetkerleri 24 jastaǵy qyzynyń jańa týǵan balasyn jeke kúnkóris maqsatynda satpaqshy bolǵan 48 jastaǵy áıeldi qolǵa túsirdi. Kelip túsken jedel aqparat boıynsha kelisimdi qyzdyń anasy júrgizgen. Qyzynyń bosanýy aldynda, ıaǵnı 2014 jyldyń mamyrynan bastap bolashaq balany alatyn klıent izdegen jáne ótemaqy retinde Aqtóbe qalasynan 2 bólmeli páter talap etken. Birneshe kezdesýden jáne telefon arqyly sóıleskennen keıin kúdikti balany 1 mln.600 myń teńgege satýǵa kelisken», - delingen vedomstvo habarlamasynda.

Satylmaq bolǵan bala 27 shildede Aqtóbe qalasy MJJA bosaný bólimshesine  ómirge kelgen. Náreste qyz bala bolypty. Keıin qyzdyń anasy balany aýrýhanadan shyǵarǵan kezde aqshany birden berýdi talap etken. Olar osy «satylym» kezinde, 2014 jylǵy 29 shildede qolǵa túsken. Sanksıalanǵan tintý barysynda aqsha jáne bosanǵan áıeldiń atyna berilgen qujat tárkilengen. Kúdiktilerge qatysty qamaý túrindegi bultartpaý sharasy qoldanyldy jáne QR QK 133-baby 2-tarmaǵy boıynsha qylmystyq is qozǵaldy. Tergeý amaldary júrgizilip jatyr», - dep habarlanǵan vedomstvo málimetinde.

Qamshy-aqparat