Alaıda, «Juldyzdar otbasy», «Ańyz adam» jýrnaldarynyń quryltaıshysy ári bas redaktory Jarylqap Qalybaı abai.kz ke bergen suhbatynda sot sheshimimen kelispeıtinin ári bul istiń saıası astary bar ekenin aıtady.
Jarylqap Qalybaı (sýrette), «Juldyzdar otbasy», «Ańyz adam» jýrnaldarynyń quryltaıshysy ári bas redaktory:
- Men sot sheshimimen kelispeımin. Qazir «Ańyz adam» jýrnalynyń 100-nshi sany daıyndalyp jatyr. Jýrnaldyń osy júz sanynda da sot bizdi aıypty dep tapqan ákimshilik quqyq buzýshylyq kodeksiniń 334 baby 2 tarmaǵyn buzatyn bir sóılem de joq.
Sot sheshimi qortyndysynyń ózi qarama-qaıshylyqqa toly. Mysaly, qortyndynyń birinshi bóliminde Naǵashybaı Esmyrzaevtyń «Gıtler fashıs emes» degen maqalasynda ekstremızmdi aqtaý belgileri bar deıdi de, ekinshi bóliminde redaksıadan qoıylǵan suraqtarǵa Naǵashybaı Esmyrzaevtyń «Gıtler fashıs emes» jáne Myrzaǵalı Hasenniń «Maın kampfta kóp nárse durys jazylǵan» taqyrybymen berilgen jaýabyndaekstremızmdi aqtaý belgileri bolýy múmkin deıdi. Minekeı, birinshi bólimde «bar» dese, ekinshisinde «múmkin» deıdi. Jáne sot saýalnama men maqalanyń ne ekenin ajyratpaǵan. Birese «maqala» deıdi, endi birde «redaksıadan qoıylǵan suraqtar» deıdi. Iaǵnı, saraptama durys jasalmaǵan. Saraptamany qaıta jasatýdy talap etip edik, olar budan bas tartty. Sottyń ekiushty dúdámal saraptamaǵa súıenip, jýrnaldy sottaýy – zańsyz.
Ekinshi dúnıejúzilik soǵys jáne Gıtlerge arnalǵan jýrnaldyń sany 52 betten turady. Al, sot jýrnaldyń bir betin ǵana alyp, bizge úkim shyǵaryp otyr.
Bizde ádildik joq, ádil sot joq. Bizdegi sot memlekettik mashınanyń bir tetigi.
Sýrette: Sýdıa Áset Boranbaev. azattyq.org
Sottyń jazba qortyndysy qolyma tıgen soń, qalalyq sotqa shaǵymdanamyn. Qalalyq sottyń qandaı sheshim shyǵaratynyn bilmeımin, biraq, osyǵan deıin ótken úsh sotta da meni aıypty dep ádiletsiz sheshim shyǵarǵandaryna qaraǵanda, joǵarydan bir nusqaý bar sıaqty: ol – saıası tapsyrma shamasy.
Joǵary jaqta otyrǵan bir jigit kezinde menimen áriptes bolǵan. Ekeýmiz de oqytýshy boldyq. Aralasyp júrdik. Qazir ol óte úlken qyzmette. Sol jigit «Juldyzdar otbasy», «Ańyz adam» jýrnaldary dúrildep turǵan kezde, osydan eki jyl buryn maǵan kelip, usynys aıtty: «Jáke, eki jýrnaldy menimen bólis. Meni quryltaıshynyń biri etip qos» dedi. Bul usynystan men bas tarttym. Ol toǵyz aıdan kelip, taǵy aıtty. Men jáne bas tarttym. Sodan keıin ol maǵan jaýyǵyp ketti. Dál osy sekildi joǵarǵy bılikte baspasóz salasyna bas-kóz bolyp otyrǵan adamdar qosymsha áreket jasap jatqanǵa uqsaıdy. Árıne, qolymda dálel-dáıek joq, biraq, istiń qısyny soǵan saıady. Kúdigim bar.
Mine, osyndaı nárseler turǵan kezde ádildikke jetýim qıyn. Biraq men talmaı kúrese beremin.
Abai.kz
(Áýelgi taqyryp: Ádiletsiz sheshimniń arjaǵynda saıası tapsyrma bar sıaqty)
