Qazaq– erteden «qyzym – barym, arym, qonaǵym» dep qasterlegen halyq. Týmysynan batyr halyqtyń Tumar men Zarınadaı patshasy, ádildik pen ádilettiliktiń aq týyn ustaǵan Aısha bıbi jáne Qarashashtaı sheshenderi, jarynyń oshaǵyn sóndirmeı, bútin bir eldi basqarǵan Aıǵanymdaı kósemderi, keshegi nemis fashıserine qarsy kúreste Mánshúk pen Álıadaı qorǵany, táýelsizdiktiń erteńi úshin kúresken Lázzat pen Sabıradaı batyr qyzdary boldy. Kórkine aqyly saı qazaqtyń qyzy, mine, osyndaı tekti. Osyndaı batyr halyqtyń taǵy bir qyzy búginde 17 jasynda álemdi aýzyna qaratyp, sulýlyǵymen mıllıondaǵan tabynýshynyń kýmırine aınaldy. Ol kim dep otyrǵan shyǵarsyzdar. Sońǵy eki apta ishinde ǵalamtor saıttary men áleýmettik jelilerdiń tańdanysyn týdyryp, sulýlyq qupıasyn jarysa jazyp jatqan shetel basylymdarynyń juldyzy - qarapaıym qas-saqtyń has sulýy Sabına Altynbekova. Alǵash qazaq qyzynyń kelbetin qytaılyqtar baıqaǵan. Ony «Azıa birinshiligindegi eń sulý volleıbolshy» dep ataǵan-sheteldik «Daily Mail» basylymy. Al sheteldik 9gag.com saıtyndaǵy Sabına Altynbekovanyń jarıalanymy men fotosýreti 300 000 pikir jınaǵan. Qoldanýshylar Sabınanyń tabıǵı sulýlyǵy men japondyq anımasıa keıipkerlerine uqsaıtyndyǵyn aıtqan. Al ýkraındyq ua.tribuna.com portaly qazaq qyzynyń Taıpeıdegi jarystaǵy fotosýretterin ǵalamtorǵa jarıalap: «Qazaq qyzy Sabına Altynbekova – eń jas, sulý sportshy», – dep moıyndap, maqala jazǵan. Al ındonezıalyq bandung.bisnis.com portaly: «Sabına Altynbekova óziniń tabıǵı sulýlyǵynyń arqasynda eldiń nazarynda júr. Onyń sýretteri – túrli BAQ-tyń naǵyz vırýsy», – dep jar saldy. Búginde otandyq BAQ pen sheteldik áleýmettik jeliler voleıbolshy Sabına Altynbekova týraly jarysa jazyp jatyr. Onyń syrt kelbetiniń ózindik qupıasy týraly tamsanyp, qazaqtyń qarshadaı qyzynyń tabynýshysyna aınalǵandar qanshama. Bıylǵy jyly qazaq sportynda fenomen qalyptastyrǵan Sabına Altynbekova týraly jańashyldyqty basynan bastap baıandasaq.
Sportshy Sabına Altynbekova voleıboldan Qazaqstan jastar quramasyndaǵy – jalǵyz qazaq qyzy. Bárimiz biletindeı, qurama komandalardan qarakózderimizdi neken-saıaq kórip qalatynymyz bar. Negizinen, bizdiń eldiń namysyn ulttyq quramalardyń ózinde shetel legıonerleri men ózge ult sportshylary qorǵap keledi. Jalǵyz qaryndasymyz Sabına Altynbekova ulttyq quramamen Qytaıdyń Taıpeı aralynda ótken voleıboldan Azıa birinshiligi synyna qatysýǵa joldama alyp, el namysyn qorǵap qaıtty. Biraq bul joly elimizdiń voleıboldan qyzdar quramasy birinshilikte jeńiske jete qoımady, tipti, sońǵy oryndardyń birin bólisip qaıtty. Esesine Sabına Altynbekova Qytaı men Taıpeı, Azıa qurlyǵynyń mıllıondaǵan tabynýshysyn ózine tánti etti. Aıaqastynan áleýmettik jelilerdiń juldyzyna aınalǵan Sabına Altynbekovany elge oralǵan boıda aldymen jýrnalıser qaýymy qarsy alyp, bul jańashyldyqty bólisýge shaqyrdy. Sabına Altynbekova óziniń basyna qonǵan baq pen ataqty, oǵan qalaı qaraıtynyn bylaı jetkizdi: «Shynymdy aıtsam, ózim de tań qaldym. Qazaqstannyń halyqaralyq jarystarda joǵarǵy oryn alyp júrýine óz úlesimdi qosyp júrgen qarapaıym qyzbyn. Mundaı áıgililik meni tańdandyrdy dep aıta almaımyn». Onyń sózine qaraǵanda, voleıboldan ótken Azıa birinshiligi barysynda Taıpeıde ár qadamyna múmkindik bermepti. «Nege olaı bolǵanyn bilmedim. Ózim de osy suraqty qoıamyn. Nege dál men? Maǵan jaqsy komplımentter aıtyp, syılyqtar bergeni jaqsy, árıne. Eń bastysy, kóptegen adamdar Qazaqstan týraly da bilip qalady. Azıada bizdiń týymyzben sýretke túsip, bizge jankúıer boldy», – dep óziniń tańdanysyn da jýrnalıser qaýymymen bólisti. Áleýmettik jeliler men saıttardaǵy áıgililigi týraly ol bylaı dep jaýap berdi: «Tvıtterde» akkaýntym joq, Ask me óshirip tastaǵan, tek «ınstagram» men «vkontaktede» ǵana akkaýntym bar, biraq kóbisi meniń atymnan ashyp alady, olar nege olaı isteıtinin túsinbeımin». Bir-aq kúnde ǵalamtor juldyzyna aınalǵan Sabınanyń sózine qarasaq, ol úshin ataq pen dańq, áıgililik maqsat emes, eliniń erteńgi sportynyń bolashaǵyn álemdik syndardan bıiktetip, eliniń atyn shyǵarýdy ǵana oılaıdy eken. Árqashan da juldyz emes, qarapaıym qazaqtyń qyzy bolý basty maqsaty. Tipti, syrtqy kelbeti men sulýlyǵy álemdi moıyndatqan Sabınaǵa qazirgi tańda túrli modeldik agenttikter usynys bildirýde, biraq olardyń barlyǵyna: «Men sán agenttikterinde jumys isteýge qarsymyn. Men sportty tańdadym», – dep jaýap bergen. Al sulý bıkeshtiń anasy Nurıpa Ámirova: «Model bolýǵa usynystar túsip jatqanyn bilemiz, alaıda biz ata-anasy retinde qarsymyz, ol qarshadaıynan sportty tańdady. Ol sol jolda qyzmet etedi», – deıdi. Al Sabınanyń jattyqtyrýshysy Nurlan Sadyqov bolsa, bul ataqtylyqqa asa qýanyshty emes ekenin: «Sabına Altynbekova – eńbekqor sportshy, óte qarapaıym. Biraq bul ataqtylyǵy onyń sporttyq karerasyna syzat túsiredi dep oılamaımyn. Biraq komandaǵa áser etýi múmkin», – dep qazaq qyzynyń sporttyq karerasynyń jalǵasýyn tileıdi. Laıym, biz de sony tileıik. Qazaqtyń arý qyzy sán modelderi men jarnama agenttikterinde júrgenshe, ulttyq qurama sapynda el namysyn qorǵap júrsin demekpiz. Álem eli qazaqtyń sulýlyǵyna tamsanyp, «Borat» fılmindegi keıipkerler qazaq qyzdary emestigine kózi jeter bálkim...
Altynbek QUMYRZAQULY
Abai.kz
