Bokstan Olımpıada chempıony Baqtıar Artaevtyń qatysýymen bolǵan oqıǵa jónindegi qylmystyq is toqtatyldy. Tengrinews.kz tilshisine bul aqparatty sportshynyń advokaty Jarqynbek Jumyrov habarlady.
“Qylmystyq is qylmys quramynyń joqtyǵyna baılanysty toqtatyldy”, – dep jaýap berdi advokat. Áleýmettik jelilerde Instagram qoldanýshylarynyń biriniń fotosýreti jarıalandy. Onda Baqtıardyń áýejaıda otyrǵany túsirilgen. Fotonyń astyna istiń sheshilgeni jáne Artaevtyń Londonǵa oqýǵa ketip bara jatqany týraly jazylǵan. Astana qalalyq ishki ister departamenti ázirshe bul jóninde túsinik bergen joq.
Eske sala keteıik, Baqtıar Artaev Astana polısıasy qozǵaǵan qylmystyq istińfıgýranty atanǵan bolatyn. Astana qalalyq ishki ister departamentine qala turǵyny Aısulý Ybrasheva shaǵym túsirip, 29 maýsymǵa qaraǵan túni Artaevtyń muny betinen urǵanyn aıtqan. Oqıǵa bolǵan kóńil kóterý ornynyń kúzetshileri qyzdyń aıtqandarynjoqqa shyǵardy. Olar Artaevtyń qyzdy urǵanyn kórmegen.
Artaevtyń ózi qarsy málimdeme jasap, Aısulýdyń muny ishinen tepkenin aıtty. “Bı alańynda dosymmen birge tar jolmen ótip bara jatqanmyn, keıin aıqaı estidim de artqa buryldym. Kimniń aıqaılaǵanyn túsinbedim. Qarasam, dosym qyzdy ustap tur, ol aıqaılap, bireýdi urǵysy kelip jatyr. Ol meni tanydy. Dosym qyzdy sabyrǵa shaqyrdy. Ol qyzdy bosatqan kezde, qyz kelip, meni ishimnen bir tepti. Men ol týraly aıtqym kelmegen, biraq qazir saraptamadan óttim, kózimniń astyna daq túsken”, – degen bolatyn Artaev.
