«Ýkraına Prezıdenti Petr Poroshenko Ýkraına terıtorıasyna tún ortasynda basyp kirgen Reseı áskerı kólikteriniń Ýkraın artılerıalary jaǵynan talqandalǵanyn málimdedi»,- dep habarlaıdy «Haffıngton Post» keshegi aqparatynda.

Ýkraına prezıdenti Petr Poroshenko Brıtanıa premer-mınıstri Devıd Kemeronmen telefondaǵy sóılesýde Ýkraına kúshteriniń Shyǵys Ýkraına shekarasynan basa kóktep kirgen Reseı áskerı kólikteriniń kózin qurtqanyn aıtqan. «Ýkraına Prezıdentiniń resmı saıty da bul derekti naqtylap otyr. Prezıdent saıtynyń aqparaty boıynsha, aqparat senimdi jáne naqtylanǵan, sebebi, bul qaqtyǵysta áskerı kólikterdiń deni Ýkraın artılerıalary jaǵynan talqandalǵan»,- deıdi ABC News. Reseıdiń Ýkraınaǵa basqynshylyǵyn erteden-aq mólsherlegenin aıtqan NATO bas hatshysy Anders Fog Rasmýssen: « Biz keshe túnde kýá bolǵan jaǵdaı - burynnan-aq biz kórip kele jatqan isterdiń tabıǵı jalǵasy»,-dep otyr. Osydan keıin, Aq úı de osy jaıynda eskertý jasap, jaqynnan beri Ýkraınaǵa tóngen qaýiptiń ulǵaıyp bara jatqanyn jetkizdi. Al, Brıtanıa Reseı elshisin shaqyryp, Reseıdiń Ýkraınaǵa basyp kirýi týraly túsinikteme berýin talap etken. Eýroodaqtyń syrtqy ister mınıstrleri de Reseıdiń Ýkraınaǵa jasaǵan áskerı qımyldary halyqaralyq zańdardy kópe-kórneý buzǵandyq dep eskertip otyr. Atalǵan jaǵdaıdan keıin Ýkraına jaǵy Reseı tarapynan keletin qaýiptiń asqynyp kele jatqanyn aıtyp, alańdaýshylyq bildirgenin jazady Batys aqparat quraldary. Al, Reseı tarapy bul qaqtyǵysty teristegenimen, Ýkraına áskerı kúshteriniń ókli Andreı Lysenko jýrnalısermen bolǵan brıfıńte Kıev kúshterniń qarańǵy túnde Ýkraına shekarasynan basa kóktep kirgen bir Reseılik áskerı kólikti tutqyndaǵanyn pash etip otyr. Ýkraına shekarasyndaǵy atystarda Reseılik qarýlardyń kóptep qoldanylǵandyǵyn, qoldanylǵan qarýlardyń ishinde Malaızıalyq MH17 jolaýshylar ushaǵyn atyp túsirdi delingen «Býk» zenıtti zymyran kesheniniń de bar ekendigin jazady Brıtandyq « The Guardian» aqparaty.

Sanat Naqqazaq