25 qańtarda «Qazaqstan Respýblıkasynyń Konstıtýsıasyna ózgerister men tolyqtyrýlar engizý týraly» Qazaqstan Respýblıkasy Zańynyń jobasyn búkilhalyqtyq talqylaý týraly prezıdent Nursultan Ábishulynyń jarlyǵy shyqty. Alǵashqy 10 kúni ótip ketken búkilhalyqtyq talqylaý 2017 jylǵy 26 aqpanǵa deıin ótkiziledi. Búkil halyqtyq talqylaýǵa usynylǵan «QR Konstıtýsıasyna ózgerister men tolyqtyrýlar engizý týraly» zań jobasynda negizinen bılik tarmaqtaryn qaıta bólý máseleleri qarastyrylǵan.
Alaıda, Zań jobasyn usynýshy organ halyqqa ózi pikiri men keńesin aıtýǵa, halyq bolyp talqylaýǵa múmkindik berip otyr.
Osy oraıda «Qamshy» portaly berilgen múmkindikti paıdalana otyryp, tıisti orynǵa mynadaı usynysyn hat arqyly joldaıdy:
Elbasymyz 1992 jyly Birinshi Dúnıejúzi qazaqtarynyń quryltaıynda: «Bul dúnıede bizdiń(Dúnıejúzi qazaqtarynyń. –red) bir ǵana Otanymyz bar, ol – táýelsiz Qazaqstan. Biz týǵan memleketimizdiń táýelsizdigin baıandy etýge, qýatyn arttyrýǵa, onyń ıgiligine, halyqaralyq qoǵamdastyqta abyroıynyń ósýine adal qyzmet etýge paryzdarmyz», - dep «Bar qazaq - bir qazaq» degen saryndaǵy jalyndy sóz sóılegen bolatyn. Prezıdent Nazarbaevtyń osyndaı keńpeıildi kóregendiginiń, salıqaly saıasatynyń arqasynda sonaý Táýelsizdik alǵan jyldardan bastap búginge deıin Atajurtqa mıllıonnan astam qazaq oraldy.
Qoldanystaǵy Atazań – «Biz, ortaq tarıhı taǵdyr biriktirgen Qazaqstan halqy, baıyrǵy qazaq jerinde memlekettilik qura otyryp, ózimizdi erkindik, teńdik jáne tatýlyq murattaryna berilgen beıbitshil azamattyq qoǵam dep uǵyna otyryp ... osy Konstıtýsıany qabyldaımyz», dep bastalady. Iaǵnı, bul memlekettiń baıyrǵy qazaq jeri ekenin, baǵzydan qazaq meken etip kele jatqanyn Atazańda alǵashqy jolǵa aıshyqtap turyp jazǵan.
Sondyqtan da, bul topyraq, alyp terıtorıasy bar Qazaqstan – qazaqtarǵa konstıtýsıada jazylǵandaı erkindikti syılaýy tıis.
Atazańnyń Prezıdent týraly taraýynyń, 40 babynyń, ekinshi tarmaqshasynda
«2. Respýblıkanyń Prezıdenti — halyq pen memlekettik bılik birliginiń, Konstıtýsıanyń myzǵymastyǵynyń, adam jáne azamat quqyqtary men bostandyqtarynyń nyshany ári kepili» dep jazylǵan.
Elbasy Nursultan Nazarbaev Konstıtýsıanyń kepili, Ult kóshbasshysy retinde sheteldegi qazaqtardyń elge kelýine jaǵdaı jasap, elge mıllıon qazaqty qosty. Elbasynyń osy sara joly tarıhqa qalaı altyn árippen jazylatyn bolsa, Álemdegi qazaqty bir qazaq qalǵanǵa deıin elge oraltatyndaı bap Atazańda da altyn árippen jazylýy kerek.
Elbasy bastap ketken uly kósh kelesi prezıdentterdiń tusynda da jalǵasyn tabýy úshin myzǵymas Konstıtýsıanyń ekinshi bólimindegi 10-ynshy bapqa «Respýblıka sheginen tys jerlerde turatyn etnıkalyq qazaqtar Qazaqstan Respýblıkasyna kedergizsiz oralady jáne turý merzimine qaramastan, Qazaqstan Respýblıkasynyń azamattyǵyn jeńildetilgen tártippen (tirkeý tártibimen) alady» degen tarmaq qosýdy suraımyz.
Álemniń 40-tan astam elinde tarydaı shashyp júrgen 5 mıllıon qazaqtyń elge oralýy jáne olardyń QR azamaty atanýy sıaqty kúrdeli proses Elbasy salyp bergen jolmen jalǵasyn tabýy qajet. Qoldanystaǵy kóshi-qon zańynyń turaqsyzdyǵy kesirinen sońǵy 7 jylda kóshi-qon aıtarlyqtaı turalady. Oralmandardyń azamattyq ala almaýy, olarǵa azamattyq berý tártibiniń jıi ózgerýi shetten kelgen qandastarymyzdy qınaǵany jasyryn emes. Sondyqtan da Atazańǵa ózgertýler ishinde «shetelden oralǵan qazaqtarǵa azamattyq berý» týraly usynysymyz oryn alady dep senemiz!
Usynys resmı túrde 010000, Astana qalasy Esil aýdany Úkimet úıi Qazaqstan Respýblıkasy Prezıdenti Ákimshiliginiń Memlekettik quqyq bólimi, elektrondyq poshta – ap2017@akorda.kz adresine joldanady.
«Qamshy» portaly redaksıasy
