Almatylyq jarnama agenttigi Qurmanǵazy Saǵyrbaıuly men Aleksandr Pýshkınniń súıisip turǵany beınelengen poster jasap shyǵarǵan.  Tengrinews.kz-tiń jazýynsha sýrettegi jarnama Poster Havas Worldwide Kazakhstan kompanıasynda jasalǵan, tapsyrys berýshi - Qazaqstannyń LGBT-qoǵamdastyǵy. Joba Almatydaǵy Qurmanǵazy jáne Pýshkın kósheleriniń qıylysynda ornalasqan geı-klýb - "Stýdıa 69" kóńil kóterý ornyn jarnamalaıdy eken.

Azǵyndyqty nasıhattaıtyn jáne qazaqtyń uly qaıratkeri Qurmanǵazyny qorlaıtyn jarnama áleýmettik jelilerde kópshiliktiń narazylyǵyn týǵyzyp jatyr. Qoldanýshylar bul joba uly qaıratkerlerdiń beınesin qorlap, dástúrli emes jynystyq orıentasıany nasıhattaıdy dep esepteıdi. Biraq keıbireýlerge atyshýly poster tipti unaǵan - olar "otandyq shyǵarmashylyqtyń bedeý dalasynan qandaı da bir kreatıv kórgendeı" bolǵan. Poster avtorlarynyń biri, kopıraıter Valerıı Volodın jobaǵa qatysty túsinik berdi. "Bul - batyl jumys, únemi teperish kórip júretin geı-qozǵalys jaǵdaıynda ol meılinshe dál ári ózin-ózi aqtaıdy. #redjolbors festıvaliniń qazylar alqasy ony qola júldege laıyq dep sheshti, biz qazylar alqasyn synaı almaımyz. Jádigóılik joıylsyn!" - dep túsinik jazǵan Facebook-tegi paraǵynda.

Atalǵan jarnamaǵa qatysty Túrkistan gazeti «Ulttyń ulyna aınalǵan Qurmanǵazyny ǵana emes, tutas bir ultty, Qazaqty qorlaǵan jetesizderge quzyrly organdar tarapynan tyıym salynýy tıis», - dep jazdy. Gazettiń jazýynsha  áleýmettik jeliler arqyly bir birine úndeý tastaǵan qandastar Qurmanǵazynyń urpaqtaryn tabýdy jáne quzyrly organdarǵa shaǵymdanyp, álgi geı klýb pen onyń jarnamasyn jasaǵandardy sotqa berýge bekinip otyr. 

Qamshy-aqparat