Keshe, 25 tamyz  Almaty qalasynyń kósheleriniń birinde  ilingen jarnama Qazaqstandyq jurtshylyqtyń narazylyǵyn týdyrǵan edi, jurt kóp júretin kóshede ilingen posterde Qazaq halqynyń Reseı otarshyldaryna qarsy joryq zamandarynda dombyra únimen elin jubatqan Qurmanǵazy Saǵyrbaıuly men orys jazýshysy Pýshkınniń súıisip turǵanyn beınelengen. "Stýdıa 69" klýbynyń bundaı jarnama berýdegi maqsaty qyztekelerdiń azǵyndyq qatynastaryn nasıhattaý bolǵan.

Keshe, tústen keıin óz erikterimen jınalǵan narazy jurt quzyrly organdarǵa ultty qorlaǵan jarnamany jasatýshylar men jasaýshylardy jazaǵa tartý týraly shaǵym tapsyrdy. Olardyń arasynda ánshiler Óktem Altaev, Sáken Maıǵazıev, Maqsat Rahmet, Asylhan Tólepov, Artýr Tólepov, Erlan Alımov, Qurmanǵazynyń urpaǵy Nurken Halyqbergen de bar.  Al, Tengrinews.kz-tiń jazýynsha  jarnama agenttigi óz áreketi úshin keshirim suraǵan. Olar óz áreketterin «poster shaǵyn topqa ǵana arnalǵan, atap aıtqanda, baıqaý úshin ǵana jasaldy, ol baıqaýda joba qola júldege ıe boldy», - dep túsindirgen. Sondaı-aq: "Biz prınt áleýmettik jeliler men baspasózde buryn-sońdy bolmaǵan dúrligý týǵyzady dep oılamadyq. Bul jumys syrtqy jarnama úshin qoldanylmady jáne bir jerge ornalastyrýǵa arnalmady. Ol tematıkalyq klýb ornalasqan kóshelerdiń qıylysyn meńzeıdi. Biz bul maket ar-namysyna tıgen jáne jıirkenishin týǵyzǵan adamdardan shyn júrekten keshirim suraımyz. Orystyń uly aqyny men qazaqtyń uly kompozıtorynyń mádenıetke qosqan baǵa jetpes úlesin eskere otyryp, biz bul prınttiń esh jerden basyp shyǵarylmaıtynyn, esh jerge ornalastyrylmaıtynyn nemese aqyly medıada jarıalanbaıtynyn resmı túrde habarlaımyz", - deıdi málimdeme jasady agenttik ókilderi.

Qamshy-aqparat