"Qamshy" portaly únemi áleýmettik máselelerdi kóterýmen keledi. Osy oraıda nekhabar.kz portalynda bir apta buryn jarıalanǵan aqparatty nazarlaryńyzǵa usynamyz.
Atyraýda Nursultan men Sara, Dinmuhammed pen Imanǵalı jáne Qasymjomart joqshylyqta ómir súrip jatyr. Qala mańyndaǵy Geolog aýylynda turatyn Rahmanovtar otbasynyń 3 jyl buryn baspanasy órtenip ketken. Órttiń kesirinen ómir boıy jıǵan-tergeninen, qujattarynan aırylǵan otbasy nesıe alyp, shaǵyn úı kóteripti. Biraq, qarjynyń joqtyǵynan qazir ishi-syrty tolyq bitpegen, sýyq úıde turýǵa májbúr. Al, únemi búrseń qaǵyp júretin balalar bolsa, toıa tamaq jep, jyp-jyly úıde turýdy armandaıdy.
Elge belgili tulǵalardyń esimderin ıelengen – egizder Nursultan men Sara, Dinmuhammed pen Imanǵalı jáne Qasymjomart kúni-túni ústerinen qabat-qabat kıimderin tastamaıdy. Óıtkeni, jartylaı bitpegen baspana jylýdy da ustap jarytpaı tur. Onyń ústine balalar jarytyp tamaq ta ishpeıdi. Memleketten alatyn 17 000 teńge járdemaqy men otaǵasynyń túrli jumys istep tabatyn tabysy da 7 adamdyq januıaǵa juq bolar emes. Otaǵasy Berik Rahmanovtyń mamandyǵy qurylysshy. Ol da jumys ornynda qysqartýǵa ushyrap, qazir árkimniń jumysyn jasap, azdy-kópti tabys taýyp júr. Al, otanasy Mıra Qojanazarova úıden tátti toqash, tort pisirip satyp, as-sýyn aıyryp otyr.
- Jurttyń balalary Astanaǵa barǵym keledi, samoletpen ushqym keledi dep armandaıdy ǵoı, meniń balalarymnyń armany – jyly jerde otyrý, bir kún bolsa da jyly jerde otyryp, shaı ishsek dep armandaıdy. Men sol jylylyq jaǵynan kómektesetin azamattar bolsa solardan kómek suraımyn, - deıdi otanasy Mıra Qojanazarova.
Jartylaı bitip turǵan úıdegi eski-qusqy jıhaz ben kıim-keshekti kórshi-kólem men ózge de qaıyrymdy jandar taýyp beripti. Al, bir kásipker bir jyl boıy azyq-túlikpen qamtamasyz etip kelgen eken. Ol da bıyldan bastap toqtap qalǵan. Al, Geolog selolyq okrýgi ákiminiń orynbasary Jandos Shadanovtyń aıtýynsha, ákimdiktiń uıymdastyrýymen kásipkerler úıdiń esik-terezesin ózge de qurylys materıaldaryn alyp beripti. Biraq, ákimdiktiń bul otbasyǵa óz betterinshe kómek kórsetýge shamalary jetpeıtin kórinedi. Jáne ol úshin memleket tarapynan da qarajat qarastyrylmaǵan eken.
Órt kezinde bul otbasynyń qujattary da birge ketken. Qazir tek otaǵasy ǵana qujatyn qaıta rásimdepti. Al, onyń áıeli men 5 balanyń qujattary áli kúnge deıin jasalmapty. Aıtýlarynsha, ol úshin buryn ózderi turǵan Inder aýdanyna baryp qaıtý kerek eken. Biraq, oǵan da jolaqy taba almaı otyr.
Aıym Tasbolat
