2017 jyldyń 21 aqpanynda Qazaqstan Respýblıkasynyń Syrtqy ister mınıstrligine Qyrǵyz Respýblıkasynyń Ýaqytsha senimdi ókili Qaınarbek Toktomýshev shaqyrtylǵan. Ótken kezdesýde Qazaqstannyń syrtqy ister mınıstriniń orynbasary Ǵalymjan Qoıshybaev qyrǵyz dıplomatyna «Qyrǵyzstan Prezıdentiniń Euronews telearna efırinde 2017 jyldyń 17 aqpanyndaǵy málimdemesimen kelispeýshilik jáne tańǵalý» bildirilgen nota tapsyrǵan.
Qyrǵyzstan prezıdenti Almazbek Atambaevtyń 17 aqpanda Evronús arnasyna bergen Qazaqstandy aıyptaǵan suhbatyna qatysty Qyrǵyz Respýblıkasynyń Syrtqy ister vıse-mınıstri Dınara Kemelova óz túsiniktemesin bergen bolatyn.
«Sáýirdegi oqıǵalarǵa baılanysty Qazaqstanmen shekarany jabý adamdar úshin qıyndyqtar týdyrǵan. Sonyń ishinde adam ólimine ákelgen oqıǵalar da bolǵan. Atap aıtqanda shekaradan zańdy túrde óte almaǵan bir top jigit Shý ózeninen júzip ótpek bolǵan. Ata-analary medısınalyq járdem alý úshin shekaradan ótkize almaǵan balalardyń kóz jumyp jatqany týraly habarlamalar da kelgen», - degen bolatyn Kemalova.
Dınara Kemelova atap ótkendeı, rasymen de, 2010 jyly Qyrǵyzstan azamattarynyń qazasyna ákelip soqqan oqıǵalar bolǵan. Sol jyly azamattar zańdy jolmen shekaradan asa almaǵan soń, jas jigitter Shý ózeninen júzip ótpek bolǵan. Aýyryp jatqan balasyn shekaradan asyra almaǵan ata-ananyń balasy qaıtys bolǵan. Sol bir jarym aıǵa sozylǵan shekteý kezinde qatty syrqat adamdarǵa dári jetkizý múmkin bolmaǵan soń, naýqastar kóz jumǵan. Qyrǵyz Respýblıkasyna asa qajetti dári-dármek jetpeı qalǵan soń, myńdaǵan adamnyń ómirine qaýip tóngen. Shekara jabylǵan soń, qyrǵyz halqynyń áleýmettik-ekonomıkalyq jaǵdaıy nasharlap, shıelenis órshı túsken.
Eldiń syrtqy ister vıse-mınıstri Dınara Kemelova men Bishkektegi QR Tótenshe jáne Ókiletti elshisi Aıymdos Bozjigitovtyń kezdesýinde de qyrǵyzstandyq tarap Qazaqstannyń «kórshilerdi oqshaýlap tastady» degen sózge qatysty daý týǵyzbaýdy usynǵan edi.
Eske salsaq, Euronews telearnasyna bergen suhbatynda Almazbek Atambaev jýrnalısiń «Bul odaq (EAEO-ny aıtyp otyr - red.) kóp jaǵdaıda Reseıdiń múddesin elep-eskeredi dep sanaısyz ba? (...) degen suraǵyna bylaı dep jaýap berdi: «Biz saýda-sattyq júrgizip, kórshilermen jumys jasaýymyz qajet. Eger biz Eýrazıalyq ekonomıkalyq odaqqa kirmesek, bizge shekteý qaýpi tóner edi. 2010 jyly Qazaqstan bizge 1,5 aıǵa shekteý qoıǵanda, bizde tipti adam qurbandary da boldy. Iá solaı boldy, sebebi shekteý degen jaqsy nárse emes. (...)».
