Qostanaıda oblystyq júıke júıeleri dıspanseriniń burynǵy bas dárigeri qaskóılerdiń qolynan aıanyshty jaǵdaıda kóz jumdy. Qazirgi tańda marqum Rashıda Sandybaevanyń denesinde 30-dan astam pyshaq jaraqaty bar ekeni anyqtalyp otyr. Burynǵy bas dárigerdiń múrdesin týystary keshe tańerteńgi saǵat 11 shamasynda óz úıinen tapqan, dep habarlaıdy Baq.kz

Osynaý sýyt habar qostanaılyqtardy eseńgiretip tastady. Óıtkeni, óziniń baýrap alatyn jaıdary minezimen, qyzmetine adal qaraıtyn aq halatty abzal jannyń qazasy kim-kimge bolsa da aýyr tıip otyrǵany jasyryn emes.

«Qostanaı oblysyna tanymal bilikti basshy, kásibine adal dáriger Rashıda Sandybaevanyń kisi qolynan qaza tapqandyǵy anyqtalyp otyr. Onyń denesine 30-dan astam pyshaq jaraqaty salynǵan. Marqumnyń jansyz denesi óz úıinen tabyldy. Oblystyq júıke júıeleri dıspanserin uzaq jyldar boıy basqarǵan Sandybaeva zeınetke shyqqannan keıin sot-psıhıatrıalyq sarapshysy bolyp jumys istegen. Bilikti dárigerdiń ólimi onyń qyzmetimen baılanysty bolýy múmkin», – deıdi Qostanaı oblystyq İİD baspasóz qyzmetiniń basshysy Elena Kashırına

Oblystyq ishki ister departamenti atalmysh kisi ólimine qatysty tergeý isiniń qupıa ótýine baılanysty budan ózge aqparat berýden bas tartty.

Al, Qostanaı oblystyq Densaýlyq saqtaý basqarmasy aıanyshty jaǵdaıda kóz jumǵan Rashıda Sandybaevanyń óte bilikti basshy bolǵanyn aıtty.

«Rashıda Qojahmetqyzy ómiriniń 36 jylyn psıhıatrıa salasyna arnady. 2005 jyldan beri osy saladaǵy oblystyq aýrýhananyń bas dárigeri boldy. Onyń syrtynda kóptegen jyldardan beri Densaýlyq saqtaý basqarmasynda shtattan tys bas psıhıatr qyzmetin qosa atqardy», – deıdi Qostanaı oblystyq densaýlyq saqtaý basqarmasynyń aqparattyq-saraptamalyq bóliminiń basshysy Anýar Edrısov.

Qazirgi tańda osy jantúrshigerlik kisi ólimine qatysty qylmystyq is qozǵalyp, kúdiktiler izdestirilý ústinde.