Jantúrshigerlik oqıǵa. Almaty oblysynda bir azamat 13 jyl boıy otasqan áıelin jumysyna baryp, birneshe jerinen pyshaqtap óltirgen. 33 jasynda úzilgen Janar Nasyrovanyń denesin búgin týystary aqtyq saparǵa shyǵaryp saldy. Al kúdiktini polıseıler qylmys bolǵan kúni ustaǵan. Marqumnyń jaqyndary orny tolmas qazaǵa ushyratqan adamǵa jazanyń eń aýyryn surap otyr, dep habarlaıdy 31 arna.

Qylmystyq oqıǵa "Asyl arman" turǵyn úı keshenindegi osy dárihana ishinde bolǵan. 19 aqpan kúni keshke qaraı Janar Nasyrova jumysta otyrǵan kezde kúıeýi sýyt kelip, sart ta surt pyshaq jumsaǵan.  Al qazir dárihana tergeýge baılanysty ma, áıteýir, ýaqytsha jabyq tur.

Dárihana ákimshiligi oqıǵanyń beınejazbasyn tergeýshilerge bergen eken. Janar Nasyrova sońǵy bir aıda ajyrasýǵa aryz berip, Jambyl aýdany, Aqseńgir aýylynda anasymen birge turyp jatypty. Sebebi kúıeýi Azamat Qulymbetov Uzynaǵashtaǵy úılerin óz qolymen órtep jiberipti. Týystary marqumnyń jubaıynan kórmegen qorlyǵy joq, sońǵy ýaqyttary uryp-soǵý shegine jetken edi deıdi.

NURǴAISHA MALDYBAEVA, Marqumnyń týysy:

- Úıine aparyp, qylqyndyryp muny, osy jerge ólim aýzynda keldi. Sol kúni keldim. Qaıyn sińlim maǵan zvondady, Janar ólgeli jatyr dedi. Kelsem, daýysy shyqpaıdy qyzdyń. Keńirdegi qyp-qyzyl, ezgen ǵoı.

Sodan keıin kúsh kórsetkish kúıeý balanyń ústinen aryz jazylǵan. Aýdandyq polısıa esh shara qoldanbady dep ashynady kópshilik. Arada apta ótpeı, qyzynyń jansyz denesin qushaqtap anasy, ańyrap eki balasy qaldy.

Týystarynyń aıtýynsha, mamandyǵy dáriger bolǵan kúıeý balanyń pyshaq suqpaǵan jeri joq. Marqumnyń janazasyna jınalǵan qalyń el de, týystary da qandyqol kúdiktini qatań jazalaýdy surady. Jubaıyna eki bala men anańdy da óltiremin dep qorqytqan ol aıyptan qutylyp ketse, bizdi de jaıymyzǵa qaldyrmaıdy dep sekemdenip otyr. Qazir kisi óltirý baby boıynsha sotqa deıingi tergeý júrgizilip jatyr.

AIMAN MYRZEKOVA, Almaty oblystyq İİD baspasóz qyzmetiniń jetekshisi:

- Kúdikti retinde Uzynaǵash aýylynyń 34 jastaǵy turǵyny ustalyp, Qarasaı aýdandyq İİB ýaqytsha ustaý ızolátoryna qamaýǵa alyndy.

Qaza qabyrǵasyna batqan marqumnyń anasy eki balanyń óz qaraýynda qalýyn tileıdi. Al tilshiler tildespekke kelgende kúdikti Azamat Qulymbetovtiń áke-sheshesiniń úıi jabyq turdy. Kórshilerdiń biriniń aıtýynsha, shuǵyl Astanaǵa ketipti. Aıta keteıik, osydan 4 aı buryn Talǵar aýdanynda taǵy bir azamat óz áıelin pyshaqtap óltirip, 16 jylǵa sottalǵan bolatyn.